بھارت کے حملے کی بلاول بھٹو زرداری کی مذمت

کراچی، 7 مئی (پی پی آئی) پاکستان پیپلزپارٹی کے چیئرمین بلاول بھٹو زرداری نے بھارت کی جانب سے پاکستان کی سرزمین اور شہری اہداف پر حملے کو بزدلانہ قرار دیتے ہوئے اس کی مذمت کی ہے۔ بلاول بھٹو زرداری نے کہا کہ بھارت کی یہ جارحیت ناقابل برداشت ہے اور اسے نظرانداز نہیں کیا جائے گا۔بلاول بھٹو زرداری نے کہا کہ پاکستان کی بہادر افواج، خصوصاً فضائیہ، اس حملے کا پوری عزم و حوصلے کے ساتھ جواب دے رہی ہیں۔ انہوں نے کہا کہ کسی بھی مہم جوئی کا منہ توڑ جواب دیا جائے گا اور پاکستان مکمل طور پر متحد ہے۔انہوں نے مزید کہا کہ بھارت کے حملے میں مریدکے، بہاولپور، کوٹلی اور مظفرآباد کے شہری علاقوں کو نشانہ بنانا جنگی جارحیت ہے، اور معصوم خواتین و بچوں کو نشانہ بنانا درندگی کی علامت ہے۔ بلاول بھٹو زرداری نے کہا کہ پاکستان کی مسلح افواج ایک ناقابلِ شکست قوم کی بھرپور حمایت کے ساتھ بھارتی جارحیت کا جواب دے رہی ہیں اور بھارت کی جارحیت کو کچل دیا جائے گا۔انہوں نے کہا کہ پاکستان اپنی خودمختاری کی خلاف ورزی ہرگز برداشت نہیں کرے گا۔ پاکستان متحد ہے اور مکمل طور پر تیار ہے۔