عراقی قونصل جنرل کی اسپیکرسندھ اسمبلی سے ملاقات

کراچی، 7 مئی (پی پی آئی) عراق کے قونصل جنرل ڈاکٹر ماہر مجاہد جیجان نے اسپیکر سندھ اسمبلی سید اویس قادر شاہ سے سندھ اسمبلی میں ملاقات کی۔ ملاقات میں ترجمان عبدالغفار بنگلانی، سیکریٹری سندھ اسمبلی جی ایم عمر فاروق، ڈائریکٹر جنرل میڈیا عرفان احمد میمن اور محترمہ ہما اکرام اللہ بھی شامل تھے۔ ملاقات میں پاکستان اور عراق کے تعلقات، سندھ کے عوام کے کربلا و نجف سے روحانی تعلقات اور کراچی میں دوبارہ قائم ہونے والے عراقی قونصل خانے کے بڑھتے تعاون پر گفتگو ہوئی۔ ڈاکٹر ماہر مجاہد نے ویزا سیکشن کے آغاز اور بغداد سے آئی ٹی سسٹم کے ربط کی معلومات فراہم کیں جس سے پاکستانی شہریوں کی سہولت میں اضافہ ہوگا۔سید اویس قادر شاہ نے عراق اور سندھ کے دیرینہ تعلقات کی تعریف کی اور عراقی پارلیمانی نمائندگان کو سندھ اسمبلی کے دورے کی دعوت دی۔ اسپیکر نے نجف-سندھ اور کراچی-بغداد فرینڈشپ گروپس کے قیام اور پارلیمانی تبادلوں کی تجویز بھی پیش کی۔ڈاکٹر ماہر مجاہد جیجان نے قونصل خانے کے قیام میں معاونت پر سندھ حکومت اور عوام کا شکریہ ادا کیا اور اسپیکر کے پارلیمانی وڑن کو سراہتے ہوئے ترقی، زرمبادلہ اور ثقافتی سیاحت میں تعاون بڑھانے کا عزم ظاہر کیا۔ملاقات کے موقع پر اسپیکر سید اویس قادر شاہ نے ڈاکٹر ماہر مجاہد جیجان کو سندھ اسمبلی کی لیگیسی شیلڈ، روایتی اجرک اور سندھی ٹوپی پیش کی جبکہ ڈاکٹر نے جمہوریہ عراق کی جانب سے یادگاری تحفہ پیش کیا۔