آسٹریلوی کرکٹر بریڈ ہیڈن نجی مصروفیات کے باعث آئی پی ایل سے دستبردار

میلبورن: آسٹریلوی کرکٹ ٹیم کے وکٹ کیپر بلے باز اور نائب کپتان بریڈ ہیڈن نجی مصروفیات کے باعث رواں برس شیڈول آئی پی ایل کے ساتویں ایڈیشن سے دستبردار ہوگئے۔ ہیڈن نے حالیہ انگلینڈ کے خلاف کھیلی گئی ایشز سیریز میں غیر معمولی کارکرگی کا مظاہرہ کرتے ہوئے ٹیم کو ایشز میں تاریخی فتح دلانے میں اہم کردار ادا کیا تھا۔ ہیڈن کا شمار دنیائے کرکٹ کے مایہ ناز وکٹ کیپر اور بلے بازوں میں کیا جاتا ہے لیکن انہیں کئی بار انجریز اور قومی کرکٹ ٹیم کی خاطر آئی پی ایل سے دستبرداری اختیار کرنا پڑی۔ ہیڈن رواں برس آئی پی ایل سات میں حصہ نہ لینے والے چوتھے غیر ملکی کھلاڑی بن گئے ہیں۔ واضح رہے کہ اس سے قبل سری لنکا کے کمار سنگاکارا، جنوبی افریقہ کے کرس مورس اور انگلینڈ کے ایوان مورگن بھی ایونٹ میں حصہ نہ لینے کا اعلان کر چکے ہیں۔