کراچی میٹروپولیٹن یونیورسٹی کا پاکستان آرمی کے ساتھ یکجہتی کا مظاہرہ

کراچی، 7 مئی (پی پی آئی) کراچی میٹروپولیٹن یونیورسٹی (کے ایم یو) نے پہلگام واقعے اور پاکستان و بھارت کے درمیان بڑھتی ہوئی کشیدگی کے بعد پاکستان آرمی کے ساتھ یکجہتی کا مظاہرہ کیا گیا۔یونیورسٹی کے آڈیٹوریم میں طلباء اور فیکلٹی اساتذہ و اسٹاف سمیت بڑی تعدادنے شرکت کی۔تقریب میں بھارت کی جانب سے کیے جانے والے حملوں کی مذمت کی گئی۔اس موقع پر محب وطنی کی فضا چھائی ہوئی تھی اور طلباء نے بینرز اٹھا رکھے تھے اور فوج کی حمایت میں نعرے لگارہے تھے۔ طالب علم عبید الرحمن نے ایک پراثر تقریر کی، جس میں انہوں نے نوجوانوں کے قومی فخر اور استقامت کے جذبات کوابھارا۔ ڈاکٹر سروش لودھی چیئرمین چارٹر انسپیکشن کمیٹی سندھ ایچ ای سی، نے حاضرین سے خطاب کرتے ہوئے قومی اتحاد اور جارحیت کے خلاف مضبوط جواب کی ضرورت پر زور دیا۔ انہوں نے بات کرنے کا موقع ملنے پر شکریہ ادا کیا اور کہا کہ جنگیں صرف ہتھیاروں سے نہیں بلکہ عزم و یقین سے لڑی جاتی ہیں، اور بھارت کے حملے پر پاکستان آرمی کے فوری ردعمل کی تعریف کی۔ڈاکٹر لودھی نے بھارت کی جارحیت پر تبصرہ کرتے ہوئے کہا کہ بھارت کے اقدامات ان کی اپنی کمزوریوں کو ظاہر کرتے ہیں۔انہوں نے کہا کہ رافیل طیارے بنانے والی کمپنی کی ساکھ حالیہ واقعات کی وجہ سے متاثر ہوئی ہے۔وائس چانسلر پروفیسر ڈاکٹر وسیم قاضی نے ایک جذباتی تقریر کی، جو علامہ اقبال کے فلسفے اور اسلام کے پیغام سے ہم آہنگ تھی۔ انہوں نے کہا کہ پاکستان کی طاقت اس کے نظریے اور روح میں ہے، صرف فوجی صلاحیتوں میں نہیں۔ اقبال کو نقل کرتے ہوئے، انہوں نے اندرونی و بیرونی چیلنجوں کا سامنا کرنے میں خود شناسی اور سچائی کی اہمیت پر زور دیا۔تقریب کا اختتام کے ایم یو کے فیکلٹی، طلباء، اور عملے کے ساتھ ریلی واک پر ہوا۔