برطانیہ اور سندھ کے درمیان تعاون بڑھانے پر اتفاق

کراچی، 13مئی (پی پی آئی) برطانیہ کے ڈپٹی ہائی کمشنر برائے کراچی، لینس ڈوم نے اسپیکر سندھ اسمبلی سید اویس قادر شاہ سے ملاقات کی، جس میں تعلیم، تجارت اور صحت کے شعبوں میں باہمی تعاون کو مزید فروغ دینے پر اتفاق کیا گیا۔اسپیکر سندھ اسمبلی نے وفد کا خیرمقدم کرتے ہوئے سندھ اسمبلی کی تاریخی حیثیت پر روشنی ڈالی اور بتایا کہ یہی اسمبلی وہ پہلا ادارہ تھا جس نے ایک علیحدہ مسلم ریاست کے قیام کے حق میں قرارداد منظور کی، اور اسی ایوان میں پہلی مرتبہ قومی پرچم لہرایا گیا۔ ملاقات میں وفد کو سندھ اسمبلی کے تاریخی ہال اور نئے اسمبلی ہال کا دورہ بھی کرایا گیا۔ملاقات میں شریک دیگر ارکان میں برطانوی سینئر سیاسی مشیر ہدیٰ اکرام، معاشی مشیر نوم روزن باؤم، ایم پی اے سعدیہ جاوید، ایم پی اے جام شبیر علی، سیکریٹری جی ایم عمر فاروق، ڈی جی میڈیا عرفان احمد میمن اور ہما اکرام اللہ شامل تھیں۔اسپیکر سندھ اسمبلی نے سیلاب اور دیگر قدرتی آفات کے دوران برطانیہ کی مسلسل حمایت پر شکریہ ادا کیا۔ ملاقات کے دوران جھوٹی خبروں اور گمراہ کن معلومات کے مسئلے پر بھی گفتگو ہوئی۔ اسپیکر اور ڈپٹی ہائی کمشنر نے اس بات پر زور دیا کہ عوامی نمائندوں کو ذمہ داری کا مظاہرہ کرتے ہوئے سماجی ہم آہنگی کو فروغ دینا چاہیے۔عالمی امور پر گفتگو کے دوران اسپیکر نے پاکستان اور بھارت کے درمیان فائر بندی کے حالیہ اعلان کا خیرمقدم کرتے ہوئے کہا کہ پاکستان ہمیشہ سے امن کا حامی رہا ہے اور تمام مسائل کو بات چیت کے ذریعے حل کرنا چاہتا ہے۔اسپیکر اویس قادر شاہ نے سندھ حکومت کے تحت منظور ہونے والے اہم قوانین کا ذکر بھی کیا، جن میں سندھ چائلڈ میرج ریسٹرینٹ ایکٹ 2013، ڈومیسٹک وائلنس ایکٹ 2013، انسداد ہراسگی ایکٹ 2010 اور ایسڈ کرائم کنٹرول ایکٹ 2011 شامل ہیں، جو خواتین کے تحفظ اور سماجی انصاف کے لیے اہم اقدامات ہیں۔انہوں نے کہا کہ سندھ ایک ہمہ گیر اور صوفی مزاج معاشرہ ہے جہاں اقلیتوں کو عزت و احترام حاصل ہے، اور حکومت اس تنوع کو محفوظ رکھنے کے لیے پرعزم ہے۔ڈپٹی ہائی کمشنر لینس ڈوم نے سندھ میں ٹرانسپورٹ کے شعبے میں ہونے والی ترقی، خصوصاً ریڈ بس اور الیکٹرک بس سروسز کے آغاز کو سراہا، جبکہ ایم پی اے سعدیہ جاوید اور جام شبیر علی نے بطور سابق وزیر ٹرانسپورٹ اسپیکر شاہ کے اقدامات پر روشنی ڈالی۔ملاقات کے اختتام پر اسپیکر سندھ اسمبلی نے مہمان کو اسمبلی کی یادگاری شیلڈ، سندھی اجرک اور سندھی ٹوپی بطور تحفہ پیش کی۔