کراچی پولیس کے اعلیٰ سطح اجلاس میں اہم فیصلے

کراچی، 14مئی (پی پی آئی) ایڈیشنل آئی جی کراچی جاوید عالم اوڈھو کی سربراہی میں کراچی پولیس کے اعلیٰ سطح اجلاس میں افغان شہریوں کی واپسی، منشیات فروشوں کے خلاف کارروائیاں، اور ٹریفک کی روانی جیسے اہم امور پر غور و خوض کیا گیا۔ اجلاس میں حکومتی احکامات پر عملدرآمد اور نئے انسدادِ منشیات قوانین کے اطلاق کے حوالے سے اہم فیصلے کئے گئے۔اجلاس میں ڈی آئی جی ایڈمن، ڈی آئی جی انویسٹیگیشن، ڈی آئی جی سی آئی اے، ڈی آئی جی ٹریفک، تمام زونز کے ڈی آئی جیز، ڈسٹرکٹ ایس ایس پیز، ایس ایس پیز انویسٹیگیشن سمیت دیگر سینئر افسران شریک ہوئے۔اجلاس کے دوران افغان شہریوں کی واپسی کے حکومتی احکامات پر عملدرآمد کا جائزہ لیا گیا۔ منشیات فروشوں کے خلاف جاری کارروائیوں کی پیش رفت پر بھی غور کیا گیا۔ٹریفک کی روانی کو بہتر بنانے اور نئے انسدادِ منشیات قوانین کے اطلاق کے لیے تفصیلی حکمت عملی پر غور ہوا۔ایڈیشنل آئی جی کراچی نے افسران کو ہدایت کی کہ ان تمام امور پر فوری موثر اور ٹھوس پیش رفت کو یقینی بنایا جائے۔ پولیس کی کارکردگی میں مزید بہتری لانے کے لئے جامع اقدامات کرنے کی ضرورت پر زور دیا گیا۔