وطن عزیز کے مزید دو بہادر جوان شہادت کے منصب پر فائز: آئی ایس پی آر

اسلام آباد، 14مئی (پی پی آئی) بھارتی مسلح افواج کی صریح اور بزدلانہ جارحیت جو 6-7 مئی کی درمیانی شب شروع کی گئی تھی، جس میں خواتین، بچوں اور بزرگوں سمیت معصوم شہریوں کو نشانہ بنایا گیا، مثالی حوصلے اور غیر متزلزل عزم کے ساتھ مادر وطن کا دفاع کرتے ہوئے آج (بدھ) کو دھرتی کے 2 مزید بہادر فرزندوں نے شہادت کو گلے لگا لیا جنہیں ہسپتال میں داخل کرایا گیا تھا۔ ان کی شہادت کے بعد پاک افواج کے شہید اہلکاروں کی کل تعداد 13 ہو گئی جبکہ 78 ڈیوٹی کے دوران زخمی ہوئے۔پاک فوج کے شعبہ تعلقات عامہ (آئی ایس پی آر) کے مطابق شہید ہونے والوں میں پاک فوج کے حوالدار محمد نوید شہید اور پاک فضائیہ کے سینئر ٹیکنیشن محمد ایاز شہید شامل ہیں۔ ان کی عظیم قربانی ان کی ہمت، فرض سے لگن اور غیر متزلزل حب الوطنی کا لازوال ثبوت ہے۔پاکستان کی مسلح افواج پاکستان کے عوام کے ساتھ  ان بہادر شہداء کو خراج عقیدت پیش کرتی ہے اور سوگوار خاندانوں سے دلی تعزیت کا اظہار کرتی ہے۔ حملے میں زخمی ہونے والے تمام افراد کی جلد اور مکمل صحت یابی کے لیے بھی دعا کی گئی ہے۔