کمشنر کراچی کے زیر صدارت اہم اجلاس: اسٹیل ملز، ایکسپریس وے اور سڑکوں کی خوبصورتی پر غور

کراچی، 14مئی (پی پی آئی) کمشنر کراچی سید حسن نقوی کی زیر صدارت کمشنر آفس میں دو اہم اجلاس منعقد ہوئے۔ پہلا اجلاس پاکستان اسٹیل سے متعلق تھا جس میں مختلف مسائل پر غور کیا گیا جبکہ دوسرا اجلاس ملیر اور لیاری ایکسپریس وے کی خوبصورتی کے لیے تھا۔پہلے اجلاس میں ڈپٹی کمشنر ملیر سلیم اللہ اوڈھو، ڈائریکٹر پاکستان اسٹیل چوہدری تنویر احمد، مزدور رہنما شمشاد احمد قریشی اور دیگر افسران نے شرکت کی۔ اجلاس میں بجلی بلوں اور ہاؤس رینٹ سے متعلق اہم فیصلے کیے گئے۔دوسرے اجلاس میں ملیر اور لیاری ایکسپریس وے کو خوبصورت بنانے کے لیے مختلف تجاویز پر غور کیا گیا۔ کمشنر کراچی نے جنگلات کے محکمے کو ہدایت کی کہ وہ ملیر ہائی وے پر قیوم آباد تا ٹول پلازہ شجر کاری کا آغاز کریں۔کمشنر کراچی نے دونوں شاہراہوں کا مکمل سروے کرکے بجٹ بنانے کی ہدایت کی۔ انہوں نے ہفتہ 17 مئی کو ان شاہراہوں کا دورہ کرنے کا بھی فیصلہ کیا۔اجلاس کے بعد کمشنر کراچی نے کائیٹ کے سی ای او زاہد سعید سے ملاقات کی اور ملیر ہائی وے کی خوبصورتی کے لیے تبادلہ خیال کیا۔ زاہد سعید نے کمشنر کراچی کو ہر ممکن تعاون کی یقین دہانی کرائی۔کمشنر کراچی نے عبداللہ ہارون روڈ سے متعلق بھی میٹنگ کی جس میں انہوں نے عبد اللہ ہارون روڈ کی کارکردگی سے متعلق معلومات حاصل کیں اور اسے ماڈل روڈ میں تبدیل کرنے کی ہدایت کی۔