اسلام آباد، 15 مئی (پی پی آئی) وزیراعظم شہباز شریف نے منگل کے روز معرکہ حق کے شہداء کو خراج عقیدت پیش کیا اور اس بات پر زور دیا کہ پاکستان کی مسلح افواج نے آپریشن بنیان مرصوص کے ذریعے بھارت کی عددی طاقت کے واہمے کو توڑ دیا۔ وزیراعظم نے ان خاندانوں کو سلام پیش کیا جنہوں نے اپنی جانوں کا نذرانہ پیش کیا، پاکستان فضائیہ کے پانچ افسران اور اہلکاروں کے ساتھ ساتھ پاکستان فوج کے چھ افسران اور جوانوں کی جرات کو تسلیم کرتے ہوئے کہا کہ ان کی قربانیوں کی بدولت ملک کی خودمختاری اور سالمیت برقرار رہی۔
وزیراعظم نے قوم کے شہدائپر فخر کا اظہار کیا اور یقین دلایا کہ ان کی قربانیوں کو ہمیشہ یاد رکھا جائے گا۔ انہوں نے بھارتی جارحیت کے نتیجے میں 40 شہریوں، جن میں 15 بچے اور 7 خواتین شامل ہیں، کی شہادت پر دکھ کا اظہار کیا اور شہداء کے خاندانوں کی حمایت کے لیے پہلے سے اعلان شدہ شہداء پیکج کے ذریعے مدد کا اعادہ کیا۔شہباز شریف نے شہدائکی بلندی درجات اور زخمیوں کی صحتیابی کے لیے دعا کی اور اس بات پر زور دیا کہ آپریشن بنیان مرصوص نے بھارت کو فیصلہ کن جواب فراہم کیا۔ انہوں نے کہا کہ پاکستان ایک پرامن ملک ہے لیکن کسی بھی قسم کی جارحیت کا جواب دینے کے لیے تیار ہے۔