بھارت نے حملہ کیا تو کشمیری عوام نے فوج کے ساتھ مل کر دفاع کیا: مظہر سعید شاہ

کراچی، 15مئی (پی پی آئی)وزیر اطلاعات آزاد جموں و کشمیر مظہر سعید شاہ نے پریس کانفرنس میں کہا کہ جب بھارت نے پاکستان پر حملہ کیا تو کشمیری عوام نے اپنے گھروں کو چھوڑنے کی بجائے فوج کے ساتھ مل کر دفاع کیا۔ انہوں نے بھارتی حکومت کے فالس فلیگ آپریشنز کو بے نقاب کرتے ہوئے کہا کہ پہلگام میں بھارتی فوج کی نااہلی واضح ہوگئی۔مظہر سعید شاہ نے بتایا کہ بھارتی حملے میں آزاد کشمیر میں 32 افراد شہید ہوئے، جن میں معصوم بچے بھی شامل ہیں۔ انہوں نے کہا کہ بھارت کی جانب سے جھوٹے دعوے کیے جا رہے ہیں کہ انہوں نے دہشتگردوں کو مارا ہے حالانکہ شہید ہونے والے معصوم شہری تھے۔وزیر اطلاعات نے کہا کہ پاکستان نے جنگ میں فتح حاصل کی اور ثابت کیا کہ وہ ایک ذمہ دار ملک ہے۔ انہوں نے کہا کہ آرمی چیف جنرل سید حافظ عاصم منیر نے بھارتی حکومت کے خلاف مضبوط موقف اپنایا ہے اور کشمیری عوام کے عزم کو سراہا ہے۔مظہر سعید شاہ نے بھارتی حکومت کی پالیسیوں کو تنقید کا نشانہ بنایا اور کہا کہ مودی حکومت اقوام متحدہ کی قراردادوں کی پاسداری نہیں کرتی۔ انہوں نے بھارت میں مسلمانوں کے خلاف اقدامات کی مذمت کی۔وزیر اطلاعات نے کہا کہ تحریک آزادی کشمیر کو کامیاب بنانے کے لیے پاکستان کی عوام اور حکومت کا تعاون حاصل ہے۔ انہوں نے پاکستانی قوم کو مبارکباد پیش کی اور کہا کہ کشمیر کی تحریک آزادی کو منطقی انجام تک پہنچایا جائے گا۔