پاکستان پیپلزپارٹی کی جانب سے پاک فوج سے اظہار تشکر کے لئے سندھ بھر میں ریلیاں

حیدرآباد، 15مئی (پی پی آئی)پاکستان پیپلزپارٹی نے پاک فوج سے اظہار تشکر کے لئے سندھ بھر میں ریلیاں نکالیں اور اجتماعات منعقد کیے۔ مختلف شہروں میں ان ریلیوں کے ذریعے پاک فوج کی خدمات کو سراہا گیا۔ٹھٹھہ میں ریلی ایدھی سینٹر سے پریس کلب تک نکالی گئی۔ اس موقع پر پاکستان، پاک فوج، بلاول بھٹو، اور آصف زرداری کے حق میں نعرے لگائے گئے۔ ریلی کی قیادت ضلع ٹھٹھہ پیپلزپارٹی کے امتیاز قریشی، محمود عالم شاہ اور دیگر رہنماؤں نے کی۔ انہوں نے اپنے خطاب میں پاک فوج کی حمایت پر زور دیا اور کہا کہ پاکستان کے عوام فوج کے ساتھ ہیں۔ریلیوں کے دوران مقررین نے پاکستان پر بری نظر رکھنے والوں کو خبردار کیا اور پاک فوج کی بہادری کو سراہا۔ سندھ کے چھوٹے بڑے شہروں میں بھی پیپلزپارٹی کی جانب سے پاک فوج کی خدمات کو خراج تحسین پیش کیا گیا۔