بجٹ میں تنخواہ دار طبقہ کو ریلیف ملنے کی امید ہ

کراچی، 19 مئی (پی پی آئی)  چیف کمشنر ان لینڈ ریونیو، ایل ٹی او کراچی زبیر بلال نے کورنگی ایسوسی ایشن آف ٹریڈ اینڈ انڈسٹری (کاٹی) کے دورے کے دوران صنعتکاروں سے خطاب کرتے ہوئے کہا کہ بجٹ میں تنخواہ دار طبقہ کو ریلیف ملنے کی امید ہے اور کرپشن کے خلاف زیرو ٹالیرنس پالیسی کا نفاذ جاری ہے۔کاٹی کے صدر جنید نقی نے اپنے خطاب میں کہا کہ حکومت کی طرف سے جامع ٹیکس پالیسی کی عدم موجودگی کی وجہ سے ٹیکس ادا کرنے والوں کو مشکلات کا سامنا ہے۔ ایف بی آر افسران کی جانب سے بلا جواز نوٹسز اور اکاؤنٹ منجمد کرنے کی دھمکیوں سے بزنس کمیونٹی کی مشکلات میں اضافہ ہورہا ہے۔چیف کمشنر زبیر بلال نے بزنس کمیونٹی کو یقین دلایا کہ کاٹی کی سربراہی میں تیار کردہ بجٹ تجاویز کو اعلیٰ حکام تک پہنچایا جائے گا۔ انہوں نے کہا کہ صنعتکاروں کی معاونت کیلئے ہر ماہ میٹنگ منعقد کی جائے گی تاکہ مسائل کا حل باہمی مشاورت سے کیا جاسکے۔جنید نقی نے ترمیمی ٹیکس آرڈیننس پر تحفظات کا اظہار کرتے ہوئے کہا کہ ان ترامیم سے بنیادی حقوق کی خلاف ورزی ہوتی ہے۔ انہوں نے حکومت پر زور دیا کہ ٹیکس اہداف میں اضافے کا بوجھ موجودہ ٹیکس دہندگان پر نہ ڈالا جائے۔قائمہ کمیٹی کے چیئرمین طارق ملک نے کہا کہ ٹیکس چوری کرنے والے عناصر کے خلاف کارروائی کی جانی چاہیے، جبکہ ایف بی آر کی جانب سے ٹیکس ادا کرنے والوں کو ہی ذمہ دار سمجھا جاتا ہے۔ انہوں نے کہا کہ بزنس کمیونٹی میں ٹیکس چوری کرنے والوں کی تعداد بہت معمولی ہے۔تقریب میں سابق صدر و چیئرمین فرحان الرحمان، احشام الدین، اور سینئر نائب صدر اعجاز شیخ نے بھی خطاب کیا۔