فیلڈ مارشل عاصم منیر نے قوم کے شکریے میں اعزاز قوم کے نام کیا

اسلام آباد، 20 مئی (پی پی آئی)  فیلڈ مارشل عاصم منیر نے فیلڈ مارشل کا اعزاز ملنے پر اللہ تعالیٰ کا شکر ادا کرتے ہوئے اس عظیم اعزاز کو پوری قوم، افواجِ پاکستان، اور خاص کر سول اور ملٹری شہداء  اور غازیوں کے نام وقف کردیا۔ فیلڈ مارشل عاصم منیر نے اپنے بیان میں کہا کہ وہ صدرِ پاکستان، وزیرِ اعظم، اور کابینہ کے اعتماد کے شکر گزار ہیں۔ انہوں نے مزید کہا کہ یہ اعزاز قوم کی امانت ہے، جس کو نبھانے کے لیے وہ خود کو قربان کرنے کے لیے تیار ہیں۔انہوں نے کہا کہ یہ اعزاز انفرادی نہیں بلکہ افواجِ پاکستان اور پوری قوم کے لئے ہے۔ فیلڈ مارشل عاصم منیر نے قوم کا شکریہ ادا کیا اور اس عزم کا اظہار کیا کہ وہ اس اعتماد کو برقرار رکھنے کے لیے ہر ممکن کوشش کریں گے۔