اوکاڑہ میں غیر قانونی ایل پی جی گاڑیوں کے خلاف کاروائی

اوکاڑہ،22 مئی (پی پی آئی)ڈپٹی کمشنر احمد عثمان جاوید کی ہدایت پر ڈسٹرکٹ ریجنل ٹرانسپورٹ اتھارٹی نے غیر قانونی ایل پی جی فٹڈ گاڑیوں کے خلاف کاروائیاں کی ہیں، جن کے نتیجے میں 30 ہزار روپے جرمانہ عائد کیا گیا ہے اور 6 گاڑیاں بند کردی گئی ہیں۔سیکرٹری ڈی آر ٹی اے وآصف یاسین کے احکامات پر افسران نے مختلف مقامات پر پبلک ٹرانسپورٹ کی چیکنگ کی۔ اس دوران وہ گاڑیاں جو ایل پی جی پر چل رہی تھیں، انہیں بند کروا دیا گیا۔چیکنگ کے دوران گاڑیوں سے ایل پی جی سلنڈر اتار دیے گئے اور مالکان پر 30 ہزار روپے کا جرمانہ عائد کیا گیا۔سیکرٹری ڈی آر ٹی اے وآصف یاسین نے اس موقع پر کہا کہ ایل پی جی فٹڈ گاڑیاں جان لیوا حادثات کا باعث بن سکتی ہیں۔ انہوں نے ٹرانسپورٹرز کو ہدایت کی کہ وہ ذمہ داری سے کام لیں اور پبلک ٹرانسپورٹ کو ایل پی جی پر نہ چلائیں، بصورت دیگر بھاری جرمانے عائد کیے جائیں گے اور گاڑیاں بند کردی جائیں گی۔