اسکول جاتے ہوئے تین بچے باپ سمیت ٹرالر تلے کچلے گئے

اوکاڑہ، 24 مئی (پی پی آئی)بچوں کو اسکول چھوڑنے جانے والا باپ تیز رفتار ٹرالر کی زد میں آ کر تین بچوں سمیت جاں بحق ہو گیا۔تفصیلات کے مطابق ہفتے کے روز صبح ساڑھے سات بجے پیش آنے والے اندوہناک حادثے میں 43 سالہ محمد ندیم اپنے تین کمسن بچوں سمیت جاں بحق ہو گیا۔ متوفی محمد ندیم اپنے بچوں کو اسکول چھوڑنے جا رہا تھا کہ تیز رفتار ٹرالر نے بے قابو ہو کر ان کی موٹر سائیکل کو کچل دیا۔ جاں بحق ہونے والوں میں محمد ندیم کے ساتھ اس کا 10 سالہ بیٹا آریان، 8 سالہ بیٹا آیان اور 6 سالہ بیٹی آئزہ فاطمہ شامل ہیں۔یہ دردناک واقعہ جی ٹی روڈ پر نجی کالج کے قریب اس وقت پیش آیا جب وہ اپنے گاؤں 24/2R سے بچوں کو تعلیمی ادارے چھوڑنے کے لیے روانہ ہوا تھا۔ریسکیو ٹیموں نے لاشوں کو فوری طور پر اسپتال منتقل کیا، جبکہ پولیس نے موقع پر پہنچ کر قانونی کارروائی شروع کر دی ہے۔پولیس نے ٹرالر کو قبضے میں لے لیا ہے اور مزید تفتیش جاری ہے۔