عمران نے واضح کر دیا کہ وہ اپنی ذات کیلئے ڈیل نہیں کریں گے: جمشید اقبال چیمہ

لاہور، 25 مئی (پی پی آئی)پاکستان تحریک انصاف کے سینئر رہنما جمشید اقبال چیمہ نے کہا ہے کہ بانی پی ٹی آئی عمران خان آئین و قانون کے مطابق ملک کو چلانے کے نظام کے نفاذ کی جدوجہد سے پیچھے نہیں ہٹے ہیں۔ انہوں نے یہ بات سابق رکن پنجاب اسمبلی میاں اکرم عثمان سے ان کی رہائشگاہ پر ملاقات کے دوران کہی، جو حال ہی میں دو سال بعد رہا ہوئے ہیں۔جمشید اقبال چیمہ نے میاں اکرم عثمان کو رہائی پر مبارکباد پیش کی اور ان کی جدوجہد کو خراج تحسین پیش کیا۔ انہوں نے کہا کہ پی ٹی آئی کے خلاف ظلم اور جبر کے جو ہتھکنڈے استعمال کئے گئے، پاکستان کی کسی سیاسی جماعت کو ان کا سامنا نہیں کرنا پڑا۔انہوں نے مزید کہا کہ عمران خان نے واضح کر دیا ہے کہ وہ اپنی ذات کے لئے کوئی ڈیل نہیں کریں گے۔ عمران خان کے بلند حوصلے کی وجہ سے پی ٹی آئی کے کارکنوں کے حوصلے بھی بلند ہوئے ہیں۔