کراچی، 31 جولائی 2025 (پی پی آئی): پاپوش تھانے کے پیچھے نہر کے قریب پولیس کی فائرنگ سے ایک ملزم ہلاک ہوگیا، جو مبینہ طور پر پولیس حراست سے فرار ہونے کی کوشش کر رہا تھا۔ پولیس حکام نے ہلاک ہونے والے کی شناخت 28 سالہ عباس ولد عبدالمجید کے نام سے کی ہے۔ عباس کو گزشتہ روز پاپوش تھانے کی حدود سے کرسٹل میتھ رکھنے کے الزام میں گرفتار کیا گیا تھا۔ اسکے خلاف ڈکیتی، غیر قانونی اسلحہ رکھنے اور دیگر سنگین جرائم کے مقدمات درج تھے۔
آج تفتیشی افسر کی زیرِ نگرانی رپورٹنگ کے دوران عباس مبینہ طور پر بھاگ نکلا۔ پاپوش نگر پولیس کا کہنا ہے کہ پیچھا کرنے کے دوران تھانے کے پیچھے واقع نہر کے قریب عباس نے ایک اہلکار کا اسلحہ چھیننے کی کوشش کی۔ جس پر اہلکار نے اپنی جان بچانے کے لیے فائرنگ کی جس کے نتیجے میں عباس موقع پر ہی ہلاک ہوگیا۔
واقعے کی تحقیقات کے بعد ملوث اہلکار اور تفتیشی افسر کو حراست میں لے لیا گیا ہے۔ ان کے خلاف غفلت اور قتلِ خطا کا مقدمہ درج کر لیا گیا ہے۔