کراچی، 29-اکتوبر-2025 (پی پی آئی): کراچی چڑیا گھر میں مقیم رانو نامی ریچھ کی گلگت بلتستان منتقلی کے حوالے سے سندھ ہائی کورٹ کے احکامات پر عملدرآمد شروع ہو گیا ہے۔ اس سلسلے میں چیف سیکریٹری سندھ آصف حیدر شاہ کی زیر صدارت سندھ سیکریٹریٹ میں ایک اعلیٰ سطحی اجلاس منعقد ہوا جس میں رانو کی منتقلی کے انتظامات کا جائزہ لیا گیا۔
آج جاری ہونے والے ایک بیان کے مطابق، اجلاس میں سیکریٹری جنگلات و جنگلی حیات، میونسپل کمشنر کے ایم سی، کنزرویٹر سندھ وائلڈ لائف ڈیپارٹمنٹ، اسلام آباد وائلڈ لائف مینجمنٹ بورڈ کے نمائندوں اور جنگلی حیات کے دیگر ماہرین نے شرکت کی۔ شرکاء نے چیف سیکریٹری کو ریچھ کی منتقلی کے حوالے سے اب تک ہونے والی پیش رفت سے آگاہ کیا۔