[مقامی خبریں، پولیس کارروائی] – سکھر میں پولیس مقابلہ ، بدنام زمانہ ڈاکو بیٹے سمیت ہلاک؛ پولیس اہلکار اور بچہ زخمی ، وزیر داخلہ سندھ کی مبارکباد

سکھر، 12 نومبر 2025 (پی پی آئی): اولڈ سکھر میں آج صج پولیس مقابلے کے دوران علاقے میں دہشت کی علامت سمجھا جانے والا ایک مطلوب ڈاکو اپنے بیٹے سمیت ہلاک ہو گیا، جبکہ کارروائی میں ایک پولیس اہلکار اور ایک بچہ بھی زخمی ہوا۔

ڈی آئی جی سکھر کے مطابق، بدنام زمانہ ڈاکو سلطان شاہ سے مقابلہ تعاقب کے بعد سی-سیکشن تھانے کی حدود میں ہوا۔

فائرنگ کے تبادلے میں ایک اہلکار زخمی ہوا۔ دوسری جانب، روہڑی میں مبینہ ڈکیتی کے دوران ملزمان کی فائرنگ سے ایک بچہ زخمی ہو گیا۔

اس کارروائی پر، وزیر داخلہ سندھ ضیاء الحسن لنجار نے مبینہ مجرموں کے خلاف کامیاب کارروائی پر ڈی آئی جی سکھر اور ان کی ٹیم کو تعریفی پیغام بھیجا ہے۔

وزیر داخلہ سندھ نے کہا، “جرائم کے خلاف آپ کی مؤثر حکمت عملی اور لائحہ عمل ہر سطح پر قابل تعریف ہے۔”

ضیاء الحسن لنجار نے تبصرہ کیا کہ پولیس کے سخت ردعمل اور مسلسل کارروائیوں نے ڈاکوؤں کو ہتھیار ڈالنے پر مجبور کر دیا ہے۔

وزیر داخلہ نے مزید کہا، “جب بات امن و امان اور عوامی تحفظ کی ہو تو سخت قانونی اور آہنی اقدامات ضروری ہو جاتے ہیں۔”