سری نگر(پی پی آ ئی) بھارت کے زیر قبضہ جموں و کشمیرمیں کل جماعتی حریت کانفرنس کے رہنماؤں اور تنظیموں نے قائد حریت سید علی گیلانی کی حیدر پورہ سرینگر میں واقع رہائش گاہ پر قبضے کے بھارتی حکومت کے منصوبے کی مذمت کرتے ہوئے کہا ہے کہ بھارت کشمیریوں کو جذباتی اور نفسیاتی طور پر نشانہ بنانے کے لیے یکے بعد دیگرے سازشیں کر رہا ہے۔حریت رہنماؤں اور تنظیموں نے سرینگر میں جاری اپنے بیانات میں کہا کہ ایسے اوچھے ہتھکنڈوں کے ذریعے مودی حکومت کبھی بھی کشمیریوں کے جذبہ حریت کو کمزور نہیں کرسکتی۔ انہوں نے کہا کہ قائد حریت سیدعلی گیلانی کی رہائش گاہ کو ضبط کرنے کا گھناؤنہ منصوبہ کشمیری عوام کی یادداشت سے مزاحمت کی علامت اور انہیں ان کے عظیم ثقافتی، تاریخی ورثے کو مٹانے کی مودی کی ہندوتوا حکومت کی ایک بڑی سازش کا حصہ ہے۔ حریت رہنماؤں نے کہا کہ سید علی گیلانی کی حیدر پورہ کی رہائش گاہ کشمیریوں کی تحریک آزادی کا مرکز رہی ہے جہاں سے کئی دہائیوں تک قائد حریت نے جدوجہد آزادی کی قیادت کی اور جہاں انہوں نے یکم ستمبر 2021کو نظربندی کے دوران وفات پائی۔ انہوں نے کہا کہ آر ایس ایس کی حمایت یافتہ مودی حکومت کی مقبوضہ کشمیر میں تمام سازشیں ناکام ہو جائیں گی۔
Next Post
عمران خان کا وزیر آباد واقعے کی ایف آئی آر چیلنج کرنے کا اعلان
Tue Nov 8 , 2022
لاہور(پی پی آ ئی) پاکستان تحریک انصاف کے چیئر مین اور سابق وزیراعظم عمران خان نے وزیر آباد میں پی ٹی آئی کے لانگ مارچ پر حملہ اور خود پر فائرنگ کی درج ہونے والی ایف آئی آر کو چیلنج کرنے کا اعلان کیا ہے۔میڈیا ذرا ئع کے مطابق عمران […]