اسلام آباد، 4-دسمبر-2025 (پی پی آئی): پاکستان اور کرغزستان نے آج (جمعرات) اسلام آباد میں وفود کی سطح پر بات چیت کی۔ وزیراعظم محمد شہبازشریف نے پاکستانی وفد جبکہ صدر صادر ژپاروف نے کرغز وفد کی قیادت کی۔
دونوں رہنمائوں نے پاکستان اور کرغزستان کے درمیان تعلقات کو وسعت دینے اور مضبوط بنانے کی اہمیت پر زور دیا جو تاریخی روابط، ثقافتی یکسانیت، مشترکہ اقدار اور علاقائی امن وخوشحالی کی مشترکہ سوچ سے منسلک ہیں۔
انہوں نے شراکت داری کو خصوصا تجارت، توانائی، روابط اور عوام کی سطح پر رابطوں کے شعبوں میں مزید مضبوط بنانے کے عزم کا اظہار کیا۔
معاشی تعاون میں اضافے کی ضرورت کو اجاگر کرتے ہوئے فریقین نے دوطرفہ تجارت اور سرمایہ کاری کو وسعت دینے اور سال دوہزار ستائیس اٹھائیس تک دوطرفہ تجارتی حجم بیس کروڑ ڈالر تک لے جانے کا ہدف مقرر کرنے پر اتفاق کیا۔
فریقین نے علاقائی استحکام کیلئے توانائی رابطے کی اہمیت کا اعتراف کیا۔
انہوں نے کاسا1000 منصوبے پر بروقت اور موثر عملدرآمد کی اپنی مشترکہ سوچ کا اعادہ کیا جو علاقائی توانائی تعاون اور وسطی وجنوبی ایشیا کے درمیان رابطے کا اہم عنصر ہے۔
دونوں رہنمائوں نے ایک پرامن اور مستحکم افغانستان اور اس کے عوام کے پائیدار مستقبل کیلئے اپنے عزم کا بھی اعادہ کیا۔
انہوں نے اتفاق کیا کہ افغان طالبان حکومت کو عالمی برادری سے کئے گئے وعدوں کو پورا کرنا چاہیے اور دہشتگرد گروپوں کے خلاف ٹھوس کارروائیاں کرتے ہوئے پاکستان کے جائز سیکورٹی تحفظات کو دور کرنا چاہیے۔
وزیراعظم نے وژن سنٹرل ایشیا پالیسی کے تحت وسط ایشیائی ملکوں کے ساتھ روابط بڑھانے کے پاکستان کے عزم کا اعادہ کیا۔