کراچی: 7 دسمبر 2025(پی پی آئی): نادرن بائی پاس چورنگی گیٹ کے سامنے موٹرسائیکل کا ٹائر اچانک پھٹ جانے کے باعث افسوسناک حادثہ پیش آیا، جس میں ایک خاتون سمیت 6 افراد زخمی ہوگئے۔ حادثے کا شکار تمام افراد ایک ہی خاندان سے تعلق رکھتے ہیں اور انہیں فوری طور پر ایدھی ایمبولینس کے ذریعے حب سول اسپتال منتقل کیا گیا۔
زخمیوں میں 27 سالہ عرفان ولد سرفراز، 11 سالہ فریبا بنت سرفراز، 3 سالہ محنسہ بنت عرفان، 5 سالہ یوسف ولد عرفان، 9 ماہ کی فاطمہ بنت عرفان اور 22 سالہ فرزانہ زوجہ عرفان شامل ہیں۔
عینی شاہدین کے مطابق موٹرسائیکل تیز رفتاری سے جا رہی تھی کہ اچانک ٹائر برسٹ ہونے کے باعث گاڑی بے قابو ہو کر سڑک پر گر گئی۔ موقع پر موجود افراد نے فوری طور پر ریسکیو اداروں کو اطلاع دی، جس کے بعد زخمیوں کو اسپتال منتقل کیا گیا۔
پولیس حکام کے مطابق واقعے کی ابتدائی تحقیقات سے پتہ چلتا ہے کہ حادثہ موٹرسائیکل کی ناقص حالت اور ٹائر کی کمزوری کے باعث پیش آیا۔ واقعہ کے بعد علاقے میں ٹریفک کی روانی کچھ دیر کے لیے متاثر ہوئی، جسے بعد ازاں بحال کر دیا گیا۔