کراچی، 7 دسمبر 2025: اسٹیٹ بینک آف پاکستان کل سے شروع ہونے والے آٹھ ٹیموں پر مشتمل صدر کپ گریڈ-ون 2025-26 میں اپنے اعزاز کا دفاع کرنے کے لیے میدان میں اترے گا، کیونکہ پاکستان کرکٹ بورڈ نے اعلان کیا ہے کہ یہ 50 اوورز پر مشتمل ماہ بھر کا ایونٹ 8 دسمبر سے کراچی کے چار مقامات پر شروع ہوگا۔
ٹورنامنٹ کے 31 میچ 25 دسمبر تک جاری رہیں گے، جبکہ 22 اور 23 دسمبر کو سیمی فائنلز کے بعد چیمپئن ٹیم کا فیصلہ ہوگا۔ تمام آٹھ ٹیمیں سنگل لیگ راؤنڈ روبن فارمیٹ کے تحت ایک دوسرے کے خلاف مقابلہ کریں گی، ہر راؤنڈ میں چار میچ کھیلے جائیں گے اور مجموعی طور پر سات راؤنڈ ہوں گے۔
پی سی بی نے تصدیق کی ہے کہ پورے ٹورنامنٹ کی لائیو اسٹریمنگ پاکستان میں ٹیپ میڈ پر جبکہ بیرونِ ملک ناظرین کے لیے پی سی بی کے یوٹیوب چینل پر دستیاب ہوگی۔ لیگ میچز ڈے گیمز ہوں گے، ٹاس صبح 9 بجے اور پہلی گیند 9:30 بجے کرائی جائے گی۔
پہلے راؤنڈ میں غنی گلاس کا مقابلہ پی ٹی وی سے ایچ پی سی اوول گراؤنڈ میں ہوگا، جبکہ واپڈا کے سی سی اے اسٹیڈیم میں ایس این جی پی ایل کے خلاف میدان میں اترے گا۔ کے آر ایل اور ساحر ایسوسی ایٹس نیا ناظم آباد اسٹیڈیم میں آمنے سامنے ہوں گے، جبکہ دفاعی چیمپئن اسٹیٹ بینک آف پاکستان کی پہلی ٹکر او جی ڈی سی ایل سے یو بی ایل اسپورٹس کمپلیکس میں ہوگی۔ سیمی فائنلز اور فائنل کے مقامات کا اعلان بعد میں کیا جائے گا۔
ٹورنامنٹ کے فاتح کو 50 لاکھ روپے اور رنرز اپ کو 25 لاکھ روپے ملیں گے۔ بہترین بیٹر، بولر، وکٹ کیپر اور ٹورنامنٹ کے بہترین کھلاڑی کو ایک لاکھ روپے کا انعام دیا جائے گا۔ لیگ میچز اور سیمی فائنلز میں پلیئر آف دی میچ کو 25 ہزار روپے جبکہ فائنل کے بہترین کھلاڑی کو 50 ہزار روپے ملیں گے۔
اس سیزن کے کپتانوں میں معیز غنی (غنی گلاس)، افتخار احمد (کے آر ایل)، عدیل امین (او جی ڈی سی ایل)، عماد بٹ (پی ٹی وی)، عاصم علی ناصر (ساحر ایسوسی ایٹس)، شان مسعود (ایس این جی پی ایل)، عمران بٹ (اسٹیٹ بینک آف پاکستان) اور خالد عثمان (واپڈا) شامل ہیں۔
ساحر ایسوسی ایٹس نے رواں سال اپریل سے جون تک ہونے والے صدر ٹرافی گریڈ-ٹو جیت کر گریڈ-ون لسٹ اے اور فرسٹ کلاس ایونٹس میں جگہ بنائی۔
پی سی بی نے 2025-26 سیزن کے لیے گریڈ-ون ڈپارٹمنٹل ٹیموں کے مکمل اسکواڈ بھی جاری کردیے ہیں، جن میں تجربہ کار کھلاڑیوں کے ساتھ ابھرتی ہوئی صلاحیتیں بھی شامل ہیں۔