اسلام آباد، 31-دسمبر-2025 (پی پی آئی) چیف آف آرمی سٹاف اور چیفس آف ڈیفنس فورسز فیلڈ مارشل سید عاصم منیر نے کہا ہے کہ پاکستان کی علاقائی سالمیت کی بالواسطہ یا بلاواسطہ کسی بھی خلاف ورزی کا موثر اور فیصلہ کن جواب دیا جائے گا۔
انہوں نے یہ بات آج(بدھ) کو راولپنڈی میں بلوچستان کے بارے میں اٹھارہویں قومی ورکشاپ کے شرکاء سے بات چیت کے دوران کہی۔
فیلڈمارشل نے کہا کہ پاکستان کی مسلح افواج اپنے شہریوں کی جانوں کے تحفظ اور بہبود کیلئے پرعزم ہیں۔
انہوں نے بلوچستان کے عوام کی جرات و عزم اور حب الوطنی کو سراہتے ہوئے کہا کہ پاکستان کی ترقی اور خوشحالی کے لئے بلوچستان انتہائی اہمیت کا حامل ہے۔
انہوں نے وفاقی حکومت اور صوبائی حکومتوں کے متعدد اقدامات کی تعریف کرتے ہوئے عوامی فلاح و بہبود پر مبنی حکمت عملی اپنانے پر زور دیا جس میں صوبے کی سماجی و اقتصادی صورتحال کو بہتر بنانے اور عوام کے فائدے کیلئے وسیع تر اقتصادی مواقع سے استفادہ کرنے پر توجہ دی جائے۔
سید عاصم منیر نے خاص طور پر پراپیگنڈہ ختم کرنے میں سول سوسائٹی کے تعمیری کردار کا اعتراف کرتے ہوئے پائیدار ترقی کو آگے بڑھانے میں اس کے اہم کردار کو اجاگر کیا۔
انہوں نے مذموم سیاسی ایجنڈوں کو مسترد کرنے کی اہمیت پر زور دیا تاکہ اس بات کو یقینی بنایا جا سکے کہ بلوچستان کا مستقبل اس کے تمام شہریوں کی پائیدارخوشحالی کا ضامن ہو۔
سیکیورٹی مسائل پر روشنی ڈالتے ہوئے فیلڈ مارشل نے کہا کہ بھارتی حمایت یافتہ پراکسیز بلوچستان میں تشدد کاہوا دینے اور ترقی کو متاثر کرنے کا سلسلہ جاری رکھے ہوئے ہیں۔
انہوں نے اس بات کا اعادہ کیا کہ صوبے کو دہشت گردی اور بدامنی سے نجات دلانے کیلئے سیکیورٹی فورسز کی جانب سے سخت کارروائیوں کے ذریعے ایسے مذموم عزائم کو ناکام بنایا جائے گا۔
ورکشاپ میں بلوچستان کی سماجی و اقتصادی ترقی اور پاکستان کیلئے اس کی تذویراتی اہمیت سے استفادہ کرنے پر توجہ دی گئی۔