ایسا نہیں ہوسکتا کہ جمہوریت کو خطرہ ہو اور ہم پنجاب میں اقتدار مزہ لوٹتے رہیں
فواد ہیرو ہے، کل اس کے چہرے پر نہیں بلکہ جمہوری نظام کے منہ پر کپڑا ڈالا گیا
اسلام آباد(پی پی آئی)سابق وفاقی وزیر اور تحریک انصاف کے رہنما حماد اظہر کا کہنا ہے کہ اسمبلیاں چھوڑنا مشکل کام تھا، جانتے ہیں کہ آگے مزید مشکلات آئیں گی لیکن ایسا نہیں ہوسکتا کہ ملک میں جمہوریت کو خطرہ ہو اور ہم پنجاب میں اقتدار مزہ لوٹتے رہیں۔ اس طرح کے قدامات کی وجہ سے کئی جماعتوں کا ووٹ بینک تباہ ہوا۔پی پی آئی کے مطابق اسلام آباد میں پریس کانفرنس کرتے ہوئے حماد اظہر نے کہا کہ فواد چوہدری ملک کا ہیرو ہے، کل فواد چوہدری کے چہرے پر نہیں بلکہ پورے جمہوری نظام کہ منہ پر کپڑا ڈالا گیا،پنجاب پولیس کی جانب سے عدالتی احکامات ماننے سے صاف انکار کیا گیا۔ انہوں نے کہا کہ اسحاق ڈار کی پالیسیوں نے ملک کو تباہی کے دہانے پر لاکھڑا کیا ہے، تحریک انصاف کے دور میں اس طرح کے حالات کا دور دور تک کوئی تصور بھی نہیں تھا، ڈالر کا ریٹ بڑھنے سے مہنگائی کی شرح میں 10فیصد اضافہ ہوجائے گا،ملک میں پہلے ہی مہنگائی کی شرح 30فیصدتک پہنچ چکی ہے جوآئندہ چند روز میں 40فیصد تک پہنچ جائے گی۔