ارشد شریف کی 50 ویں سالگرہ پر بیٹی علیزہ کاجذباتی پیغام

اسلام آ باد(پی پی آ ئی)کینیا میں قتل کیے جانے والے صحافی ارشد شریف کی بیٹی نے والد کی 50ویں سالگرہ پر اْن کے نام سوشل میڈیا پر جذباتی پیغام لکھا ہے۔سماجی را بطے کی ویب سائٹ ٹو ئٹر پر مقتول صحافی کی بیٹی علیزہ نے والد کو 50 ویں سالگرہ کی مبارکباد دیتے ہوئے لکھا، ’میں آپ کو الفاظ میں نہیں بتاسکتی کہ آپ کی کمی کتنی محسوس ہوتی ہے، جتنا آپ جانتے ہوں گے میں اس سے کہیں زیادہ آپ سے پیارکرتی ہوں۔انہوں نے والد کے نام پیغام میں مزید کہا کہ وہ ان سے ملاقات کے لیے دن گن رہی ہیں۔اس ٹویٹ کے جواب میں پی ٹی آئی رہنما فواد چوہدری نے انہیں تسلی دیتے ہوئے لکھا کہ، ’علیزہ آپ کے والد ہمیشہ زندہ رہیں گے۔ ’ارشد شریف آزادی، حق گوئی اورظالم کے خلاف جہاد کا ایک استعارہ ہیں اورایسی شخصیات صدیوں رہتی ہیں‘۔پی ٹی آئی رہنما نے ارشد شریف کومیرے دوست اور بھائی کہتے ہوئے سالگرہ کی مبارکباد بھی دی۔واضح رہے کہ ارشد شریف کو 22 اور 23 اکتوبر کی درمیانی شب گاڑی میں جاتے ہوئے کینیائی پولیس نے فائرنگ کرکے قتل کردیا تھا۔