ملک میں ڈیجیٹل کرنسی لانچ کرنے کا منصوبہ، دیگر ممالک میں متعارف سسٹم پر غور

کراچی (پی پی آئی) اسٹیٹ بینک آف پاکستان نے ملک میں پہلی مرتبہ ڈیجیٹل کرنسی لانچ کرنے کا پلان پیش کر دیاہے۔پی پی آئی کے مطابق  اسٹیٹ بینک منصوبہ بنا رہا ہے کہ ملک میں ڈیجیٹل کرنسی لانچ کی جائے، گورنر سٹیٹ بینک نے قائمہ کمیٹی برائے خزانہ کو بتایا کہ اسیٹ بینک دنیا میں دیگر ممالک میں متعارف  ڈیجیٹل کرنسی کے سسٹم کا جائزہ لے رہا ہے اور جلد ہی ملک میں بھی ڈیجیٹل کرنسی کا منصوبہ مکمل کر لیا جائے گا۔گورنر نے قائمہ کمیٹی کو بتایا کہ وفاقی حکومت کو منصوبے سے متعلق باقاعدہ طور پر آگاہ کیا  جائے گا جس کے بعد ڈیجیٹل کرنسی کا پروگرام لانچ کیا جائے گا۔ انہوں نے مزید کہا کہ ابھی ڈیجیٹل کرنسی کا تفصیلی جائزہ لے رہے ہیں کہیں کوئی دھوکہ نہ ہو جائے۔ ان کا مزید کہنا تھا کہ وزارت خزانہ اور سٹیٹ بینک مل کر ڈیجیٹل کرنسی کے منصوبے پر کام کر رہے ہیں۔