ترکیہ کے صدر رجب طیب اردوان2روزہ دورے پر آج پاکستان پہنچیں گے

اسلام آباد11فروری (پی پی آئی)وزیر اعظم محمد شہباز شریف کی دعوت پر، ترکیہ کے صدر  رجب طیب اردوان 12-13 فروری 2025 کو پاکستان کا دورہ کریں گے۔ ان کے ہمراہ وزرا، اعلیٰ حکام اور کارپوریٹ رہنماؤں پر مشتمل وفد بھی ہوگا۔وزارت خارجہ کے ایک بیان کے مطابق، اس دورے میں پاکستان-ترکیہ اعلیٰ سطحی اسٹریٹجک تعاون کونسل (ایچ ایل ایس سی سی) کے ساتویں اجلاس کا انعقاد ہوگا، جس کی مشترکہ صدارت وزیر اعظم شہباز شریف اور صدر اردوان کریں گے۔ اجلاس کے اختتام پر ایک مشترکہ اعلامیہ اور کئی اہم معاہدوں کی توقع ہے۔صدر اردوان وزیر اعظم شہباز شریف اور صدر آصف علی زرداری کے ساتھ دو طرفہ ملاقاتیں بھی کریں گے۔ اس کے علاوہ، رہنما پاکستان-ترکیہ بزنس اینڈ انویسٹمنٹ فورم سے بھی خطاب کریں گے، جس کا مقصد دونوں ممالک کے سرمایہ کاروں اور کاروباری رہنماؤں کو اکٹھا کرنا ہے۔ایچ ایل ایس سی سی، جو کہ دونوں ممالک کے درمیان اعلیٰ سطحی فیصلہ سازی کا پلیٹ فارم ہے، دو طرفہ تعلقات کو مضبوط کرنے کے لئے اسٹریٹجک سمت فراہم کرتا ہے۔ اس دورے اور کونسل کے اجلاس سے برادرانہ تعلقات کو مزید فروغ دینے اور متعدد شعبوں میں تعاون کو بڑھانے کی توقع ہے۔