اوورسیز پاکستانی ہر مشکل میں ملک کے ساتھ کھڑے ہوتے ہیں گورنر سندھ

 لندن ،25فروری (پی پی آئی)گورنر سندھ کامران خان ٹیسوری نے اوورسیز پاکستانیوں کی حب الوطنی اور افواجِ پاکستان کی پیشہ ورانہ صلاحیتوں کو سراہا ہے۔گورنر سندھ کے پریس سیکرٹری  کے مطابق، لندن میں ایک پریس کانفرنس سے خطاب کرتے ہوئے گورنر کامران خان ٹیسوری نے افواجِ پاکستان کی عالمی سطح پر تسلیم شدہ پیشہ ورانہ صلاحیتوں کو پاکستان کی سب سے بڑی طاقت قرار دیا۔ انہوں نے جنرل سید عاصم منیر کی برطانیہ میں تعظیم کو افواجِ پاکستان کی اعلیٰ پروفیشنلزم کا ثبوت بتایا۔گورنر نے پاکستان کی سرحدوں کی حفاظت میں افواج پاکستان کے کلیدی کردار کا ذکر کیا اور کہا کہ دشمن ہماری فوج کی صلاحیتوں سے خوفزدہ ہیں۔ انہوں نے مزید کہا کہ برطانیہ، امریکہ اور خلیجی ممالک سمیت دیگر ممالک بھی ہماری فوج کی مہارت کے معترف ہیں۔گورنر سندھ نے اوورسیز پاکستانیوں کی حب الوطنی کی تعریف کرتے ہوئے کہا کہ وہ دل سے پاکستان کے وفادار ہیں اور ہر مشکل میں ملک کے ساتھ کھڑے ہوتے ہیں۔ انہوں نے 17 ہزار سے زائد اوورسیز پاکستانیوں سے ملاقات کی اور ان کی پاکستان سے محبت کو سراہا۔انہوں نے اوورسیز پاکستانیوں کے مسائل کے حل اور ان کے پاکستان سے جڑے رہنے کے عزم کو سراہتے ہوئے انہیں قیمتی اثاثہ قرار دیا۔ گورنر نے ان کے لیے مزید بہتر مواقع پیدا کرنے کی ضرورت پر زور دیا۔