وفاقی کابینہ کی تنخواہوں میں 188 فیصد اضافہ سے عوامی مفادات کو نقصان پہنچ رہا ہے:علامہ ابو الرضا دادمحمد فریادی

کوئٹہ،24مارچ (پی پی آئی)اتحاد اہلسنت پاکستان کے سربراہ علامہ ابو الرضا دادمحمد فریادی نے وفاقی کابینہ کی جانب سے وزرا، وزرائے مملکت اور مشیروں کی تنخواہوں میں 188 فیصد اضافے کی منظوری کی مخالفت کی ہے۔ انہوں نے کہا کہ اس فیصلے سے عوامی مفادات کو نقصان پہنچ رہا ہے جبکہ تنخواہ دار طبقے کو کوئی ریلیف نہیں دیا جا رہا۔علامہ فریادی نے کابینہ کے اس فیصلے کو دوغلی پالیسی قرار دیا۔ انہوں نے کہا کہ ملکی ترقی کے لئے عوامی مفادات کو مقدم رکھنا ضروری ہے۔ ان کے مطابق قوانین میں ترامیم کر کے قومی خزانے کا بے جا استعمال کیا جا رہا ہے۔انہوں نے واضح کیا کہ قومی اسمبلی کی فنانس کمیٹی نے پہلے ہی اراکین اسمبلی کی مراعات میں اضافہ کیا تھا، جس سے عوام میں مایوسی پھیلی ہے۔ انہوں نے پنجاب اسمبلی کی تنخواہوں کے اضافے کا بھی حوالہ دیا اور کہا کہ حکومت نے عام ملازمین کی تنخواہوں میں اضافہ نہ کر کے انہیں مہنگائی کے دلدل میں دھکیل دیا ہے۔علامہ فریادی نے حکومت سے مطالبہ کیا کہ وہ فوری طور پر سرکاری ملازمین کی تنخواہوں میں بھی 188 فیصد تک اضافہ کرے تاکہ وہ مہنگائی میں اپنے اہل و عیال کی بہتر کفالت کر سکیں۔