غزہ لہولہان، روزانہ دل دہلادینے والی خبریں آرہی ہیں: حنیف طیب

کراچی،09اپریل (پی پی آئی) نظام مصطفی پارٹی کے چیئرمین اور سابق وفاقی وزیر پیٹرولیم ڈاکٹر حاجی محمد حنیف طیب نے غزہ فلسطین کی موجودہ صورتحال پر تشویش کا اظہار کیا ہے۔ انہوں نے کہا کہ جنگ بندی معاہدے کے باوجود اسرائیلی حملوں کی بحالی اقوام متحدہ اور اسلامی تعاون تنظیم (اوآئی سی) سمیت دیگر عالمی اداروں کی ناکامی کی علامت ہے۔ڈاکٹر حنیف طیب نے مختلف شعبوں سے تعلق رکھنے والے افراد سے گفتگو میں اسرائیلی جارحیت کی مذمت کی۔ انہوں نے کہا کہ الیکٹرانک، سوشل، اور پرنٹ میڈیا سے غزہ کے بارے میں دل دہلا دینے والی خبریں مسلسل آرہی ہیں۔ شدید بمباری کے نتیجے میں روزانہ درجنوں افراد شہید ہو رہے ہیں اور عوام کو جبری بے گھر کیا جا رہا ہے۔انہوں نے بتایا کہ 7 اکتوبر 2023 سے جاری اسرائیلی حملوں کے نتیجے میں 53 ہزار سے زائد فلسطینی شہید ہو چکے ہیں جبکہ ڈیڑھ لاکھ سے زائد افراد زخمی ہیں جو علاج کے منتظر ہیں۔ ڈاکٹر حنیف طیب نے کہا کہ جنگ بندی معاہدوں پر فوری عمل درآمد ضروری ہے اور عالمی قوانین کی روشنی میں فلسطینیوں کو تمام حقوق فراہم کئے جائیں۔مزید برآں، انہوں نے کہا کہ غزہ کی صورتحال بے قابو ہو گئی ہے اور اسرائیل نے تمام عالمی و جنگی قوانین کو پامال کر دیا ہے۔ مسلم حکمرانوں کو چاہئے کہ وہ جرات مندانہ اور کلیدی کردار ادا کرتے ہوئے غزہ کی کشیدہ صورتحال کو کنٹرول کریں۔