پیپلزپارٹی کا خالد مقبول صدیقی کے بیان پر سخت ردعمل

لاہور، 19اپریل (پی پی آئی) ترجمان بلاول ہاوَس نے ایم کیو ایم کے رہنما خالد مقبول صدیقی کے حالیہ بیان پر سخت ردعمل دیتے ہوئے کہا کہ اپنی پارٹی کے وزراء کا فون نہ اٹھانے والا رہنما “ماسی مشاورت” کے طور پر اپنا کردار ادا کر رہا ہے۔ترجمان نے کہا کہ ایم کیو ایم کی تاریخ رہی ہے کہ وہ صبح حکومت چھوڑنے کی دھمکی دیتے ہیں اور شام کو پرانی تنخواہ پر کام کرنے پر راضی ہوجاتے ہیں۔انہوں نے سوال کیا کہ خالد مقبول صدیقی نے گزشتہ تین حکومتوں کا حصہ رہنے کے باوجود کراچی کے لیے کیا اقدامات کیے ہیں۔ترجمان نے ایم کیو ایم کے وزراء کی کارکردگی کو سب سے خراب قرار دیتے ہوئے خالد مقبول صدیقی سے کہا کہ وہ ان وزراء سے استعفے طلب کریں۔انہوں نے مزید کہا کہ خالد مقبول صدیقی کے مطالبے پر کیا ایم کیو ایم کا کوئی وفاقی وزیر استعفیٰ دے گا۔ترجمان بلاول ہاوَس نے خالد مقبول صدیقی کو نصیحت کی کہ وہ دوسروں کو مشورے دینے کے بجائے اپنی پارٹی کے اندرونی معاملات پر توجہ دیں۔انہوں نے خالد مقبول صدیقی سمیت تمام سیاسی بے روزگار افراد کو یقین دہانی کرائی کہ ان کے خواب پورے نہیں ہوں گے۔ترجمان نے اس بات کا بھی اعادہ کیا کہ چیئرمین بلاول بھٹو زرداری متنازع کینال کسی صورت نہیں بننے دیں گے۔