بلاول بھٹو زرداری کا متاثرین سیلاب کی بحالی کے منصوبے کا معائنہ

حیدرآباد، 19اپریل (پی پی آئی) پاکستان پیپلز پارٹی کے چیئرمین بلاول بھٹو زرداری نے حیدرآباد کے دیہات کا دورہ کر کے سیلاب متاثرین کے لیے سندھ حکومت کے منصوبے “سندھ پیپلز ہاؤسنگ” کے تحت تعمیر ہونے والے گھروں کا جائزہ لیا اور متاثرین میں گھروں کے مالکانہ حقوق کی اسناد تقسیم کیں۔ انہوں نے کہا کہ حکومت سندھ نے سیلاب متاثرین کے لیے گھروں کی تعمیر کا وعدہ پورا کیا ہے اور حقوق خاندان کی خواتین کے نام منتقل کیے گئے ہیں۔بلاول بھٹو زرداری نے ہارون شیخ، جھنڈو کھوسو اور ہمت آباد دیہات کا دورہ کیا۔ انہوں نے کہا کہ گھروں کی تعمیر کا کام بڑی حد تک مکمل ہو چکا ہے اور یہ سیلاب متاثرہ خاندانوں کے لیے ایک معاشی اثاثہ بن چکے ہیں۔ انہوں نے حکومت سندھ کے اس فیصلے کو سراہا کہ گھروں کے مالکانہ حقوق خواتین کو دیے جائیں، تاکہ یہ ایک پائیدار اثاثہ بن سکے۔دورے کے دوران، بلاول بھٹو زرداری نے گاؤں گل حسن میں نابینا بچوں کے لیے بنائے گئے ٹیکٹائل ٹائلز کے ٹریک کا جائزہ لیا اور نابینا بچوں سے ملاقات کی۔ بچوں نے انہیں ٹریک کے بارے میں بریفنگ دی۔جھنڈو کھوسو میں، بلاول بھٹو زرداری نے متاثرہ افراد کو گھروں کے مالکانہ حقوق کی اسناد دیں۔ اس گاؤں میں 209 میں سے 135 گھروں کی تعمیر مکمل ہو چکی ہے۔انہوں نے ہمت آباد میں قائم اسکول اور ڈسپنسری کا بھی دورہ کیا۔ انہیں بتایا گیا کہ ہمت آباد کے مکینوں کو جبری مزدوری سے آزاد کروا کر بسایا گیا تھا اور اب سیلاب کے بعد ان کے لیے گھر تعمیر کیے گئے ہیں۔ بلاول بھٹو زرداری نے اپنے منتخب نمائندوں کو ہدایات دیں کہ گاؤں کے مسائل کو ترجیحی بنیادوں پر حل کریں۔ اس موقع پر وزیراعلیٰ سندھ مراد علی شاہ بھی ان کے ہمراہ تھے۔