ایم کیو ایم کا گلگت بلتستان انتخابات میں بھرپور شرکت کا اعلان

کراچی، 19اپریل (پی پی آئی) متحدہ قومی موومنٹ پاکستان (ایم کیو ایم) نے گلگت بلتستان میں آئندہ انتخابات میں بھرپور شرکت کا اعلان کیا ہے۔ پارٹی کے سینئر رہنما انیس قائمخانی نے ایم کیو ایم کے مرکز بہادرآباد پر گلگت بلتستان سے آئے وفد سے ملاقات کے دوران کہا کہ ایم کیو ایم گلگت بلتستان کے مسائل سے بخوبی آگاہ ہے اور ان کے حل کے لیے پرعزم ہے۔انیس قائمخانی نے مزید کہا کہ ایم کیو ایم کے امیدوار ماضی میں بھی گلگت بلتستان کے انتخابات میں کامیابی حاصل کرتے رہے ہیں۔ انہوں نے اس بات پر زور دیا کہ ایم کیو ایم گلگت بلتستان کی عوام کے مسائل کے حل کے لیے بھرپور کوشش کرے گی۔اس ملاقات میں ایم کیو ایم کے ایک اور سینئر رہنما سید امین الحق بھی موجود تھے۔ انہوں نے کہا کہ ایم کیو ایم پاکستان نے ہمیشہ متوسط طبقے سے تعلق رکھنے والے پڑھے لکھے نوجوانوں کو اقتدار کے اعلی ایوانوں تک پہنچایا ہے۔ ان کا کہنا تھا کہ نوجوان ہی ملک کا مستقبل ہیں اور ایم کیو ایم ایک ایسی جماعت ہے جو آزادی، برابری اور انصاف پر یقین رکھتی ہے۔ملاقات کے دوران گلگت بلتستان کی مرکزی کمیٹی کے اراکین بھی موجود تھے جنہوں نے ایم کیو ایم کی قیادت کے ساتھ مختلف امور پر گفتگو کی۔