پاگل کتوں کے حملے سے وادی نیلم میں 20 سے زائد افراد زخمی

مظفر آباد،21اپریل (پی پی آئی)وادی نیلم کے ضلعی ہیڈ کوارٹر آٹھمقام میں پاگل کتوں کے حملے سے 20 سے زائد افراد زخمی ہوگئے۔ زخمیوں میں خواتین، بچے اور بزرگ شامل ہیں۔ تمام زخمیوں کو ڈی ایچ کیو ہسپتال آٹھمقام منتقل کیا گیا ہے۔ پیر کی صبح جب لوگ اپنے روزمرہ کے کاموں میں مصروف تھے، پاگل کتوں نے اچانک حملہ کردیا جس سے متعدد افراد زخمی ہوگئے۔ شدید زخمی ہونے والے دو افراد کو مزید علاج کے لیے مظفرآباد ریفر کیا گیا ہے۔ شہریوں نے بلدیہ سے آوارہ کتوں کو تلف کرنے کا مطالبہ کیا ہے۔ اس حوالے سے ایڈمنسٹریٹر بلدیہ نے کہا ہے کہ پاگل کتوں کو تلف کرنے کے لیے زہر فی الحال دستیاب نہیں، تاہم زہر منگوا کر اقدامات کیے جا رہے ہیں۔ شہریوں کو احتیاط برتنے کی تاکید کی گئی ہے۔