امریکی قونصل جنرل کا دورہ حیدرآباد: امریکہ-پاکستان تعلقات کے استحکام کا مظہر

حیدرآباد، 22اپریل (پی پی آئی) امریکی قونصل جنرل اسکاٹ اربام نے حیدرآباد میں سرکاری دورے کے دوران سرکاری حکام، نوجوانوں، تعلیمی رہنماؤں، کاروباری افراد، اور امریکی حکومت کے عوامی سفارتکاری پروگرام کے گریجویٹس سے ملاقاتیں کیں۔ اس دورے کا مقصد دونوں ممالک کے درمیان مضبوط تعلقات اور اقتصادی تعاون کو فروغ دینا تھا۔امریکی قونصل خانے سے جاری کردہ پریس ریلیز کے مطابق، جامشورو کے دورے کے دوران، اربام نے پاکستان-امریکہ المنائی نیٹ ورک کی تقریب میں شرکت کی اور سینئر المنائی اراکین سے ملاقات کی۔ اربام نے المنائی نیٹ ورک کی جانب سے جاری منصوبوں کی کارکردگی کو سراہا، جو کہ اقتصادی ترقی، عوامی تحفظ، اور نوجوانوں کی شمولیت کو فروغ دے رہے ہیں۔قونصل جنرل نے گورنمنٹ کالج یونیورسٹی حیدرآباد میں انگلش ایکسس اسکالرشپ پروگرام کی تقریب میں شرکت کی۔ دو سالہ اس پروگرام نے 75 طلباء کو انگریزی زبان کی مہارت کے ساتھ ساتھ تنقیدی اور ثقافتی سوچ کے فروغ میں مدد دی۔ اس موقع پر اربام نے کہا کہ اس نوعیت کی تعلیمی سرمایہ کاری کے ذریعے امریکہ پاکستان میں طویل مدتی استحکام اور خوشحالی کو فروغ دے رہا ہے۔حیدرآباد چیمبر آف کامرس اینڈ انڈسٹری سے ملاقات کے دوران، اربام نے علاقے کی زرعی اور کاروباری صورتحال پر تبادلہ خیال کیا اور امریکی تجارت اور سرمایہ کاری کے مواقع پر بھی بات کی تاکہ اقتصادی تعلقات کو مزید مضبوط کیا جا سکے۔انہوں نے شمس العلماء علامہ داؤد پوتہ لائبریری میں لنکن کارنر حیدرآباد میں طلباء سے ملاقات کی اور بیس بال اور کرکٹ کے ذریعے کھیلوں کی سفارتکاری کے بارے میں آگاہی فراہم کی