ملک کو مشکلات سے نکالنے کے لیے عمران خان کی قیادت ضروری ہے: جمشید اقبال چیمہ

لاہور،27اپریل (پی پی آئی) پاکستان تحریک انصاف کے سینئر رہنما جمشید اقبال چیمہ نے کہا ہے کہ ملک کو بانی پی ٹی آئی عمران خان کی قیادت کی ضرورت ہے تاکہ مسائل اور مشکلات کی دلدل سے نکلا جا سکے۔ انہوں نے کہا کہ عمران خان اور دیگر قیادت جھوٹے مقدمات میں جلد سرخرو ہوں گے۔یہ بات انہوں نے حلقہ این اے 121 میں پارٹی کے دیرینہ کارکن محمد اسد کی شادی کی تقریب میں اظہار خیال کرتے ہوئے کہی۔ اس موقع پر سیاسی اور سماجی شخصیت ڈاکٹر سلیم سمیت دیگر افراد بھی موجود تھے۔جمشید اقبال چیمہ نے محمد اسد کو شادی کی مبارکباد دی اور کہا کہ کارکنان پارٹی کے سروں کا تاج ہیں۔ انہوں نے کہا کہ حکومتی جبر اور سختیوں کے باوجود تحریک انصاف کے کارکنان کے جذبے میں کمی نہیں آئی۔انہوں نے مزید کہا کہ پی ٹی آئی کی جدوجہد کو تاریخ میں سنہرے الفاظ میں لکھا جائے گا۔ ملک کو آئین و قانون کے مطابق چلانے کی جدوجہد ابھی جاری ہے۔