ریلوے اسٹیشن صاف ستھرا رکھنے کے لئے معاہدہ

راولپنڈی، 29اپریل (پی پی آئی)پاکستان ریلوے راولپنڈی ڈویژن نے وفاقی ہدایات کے مطابق اہم ریلوے اسٹیشنوں پر صفائی کی خدمات کو بہتر بنانے کے لیے راولپنڈی ویسٹ مینجمنٹ کمپنی (RWMC) کے ساتھ ایک معاہدہ کیا ہے۔ڈویژنل سپرنٹنڈنٹ ریلوے راولپنڈی نورالدین داؤد کی نگرانی میں دستخط کیے گئے معاہدے کے تحت راولپنڈی، مارگلہ اور چکلالہ سٹیشنوں اور ملحقہ علاقوں میں صفائی کی ذمہ داری RWMC کو منتقل کر دی گئی ہے۔ یہ پہل ڈویژن بھر میں صفائی کے معیار کو بین الاقوامی معیار کے مطابق بنانے کی کوششوں کا حصہ ہے۔اس موقع پر خطاب کرتے ہوئے، نورالدین داؤد نے کہا کہ پاکستان ریلوے جدید اور کسٹمر پر مبنی ریلوے نیٹ ورک کے وسیع تر وژن کے مطابق مسافروں کو حفظان صحت اورصاف ستھرے اسٹیشن فراہم کرنے کے لیے پرعزم ہے۔RWMC کے منیجنگ ڈائریکٹر رانا ساجد صفدر نے کہاکہ ان کی کمپنی مخصوص جگہوں پر موثر صفائی کی کو یقینی بنانے کے لیے تربیت یافتہ عملہ اور جدید آلات استعمال کرے گی۔ حکام نے اس شراکت داری کو صاف ریلوے، صاف پاکستان کے طویل مدتی مقصد کے حصول کی جانب ایک قدم قرار دیا۔