میرپور(آزاد کشمیر)،6مئی (پی پی آئی) پاسبانِ وطن پاکستان کے مرکزی صدر محمد طاہر کھوکھر نے بھمبر کے معروف قانون دان مرزا محمد نواز جرال کے دن دیہاڑے قتل پر اظہار افسوس کرتے ہوئے اسے انسانیت پر حملہ قرار دیا ہے۔ انہوں نے مطالبہ کیا کہ قاتلوں کو فوری گرفتار کر کے عدالت میں پیش کیا جائے تاکہ انہیں عبرتناک سزا دی جا سکے۔طاہر کھوکھر نے کہا کہ ایک قانون دان کا قتل قانون نافذ کرنے والے اداروں کی کارکردگی پر سوالیہ نشان ہے۔ اگر معاشرے کے محافظ خود غیر محفوظ ہوں تو عام شہریوں کے لیے تحفظ کی امید محض خام خیالی بن جاتی ہے۔انہوں نے مزید کہا کہ اس طرح کے واقعات انصاف کے نظام کو کمزور کرتے ہیں اور معاشرے میں خوف اور عدم تحفظ کی فضا پیدا کرتے ہیں۔ مرزا نواز جرال کی ناگہانی موت سے پورا خطہ ایک رہنما قانون دان اور عظیم انسان سے محروم ہو گیا ہے۔طاہر کھوکھر نے حکومت آزاد کشمیر اور متعلقہ اداروں سے اپیل کی کہ وہ اس واقعے کا فوری نوٹس لیں اور مجرموں کو کیفر کردار تک پہنچائیں۔ انہوں نے کہا کہ معاشرے میں بڑھتے ہوئے پرتشدد رجحانات کو روکنا ہم سب کی مشترکہ ذمہ داری ہے۔انہوں نے عوام کو برداشت اور صبر سے کام لینے کی تلقین کرتے ہوئے کہا کہ عدم برداشت خاندانوں کو تباہ کر سکتی ہے۔
Next Post
ملک میں سونے کی قیمت 3لاکھ 56ہزار ایک سو روپے تولہ کی بلند ترین سطح پر
Tue May 6 , 2025
کراچی، 6 مئی (پی پی آئی) پاکستان اور بین الاقوامی منڈیوں میں سونے کی قیمتوں میں اضافہ ہوا ہے۔ آل پاکستان صرافہ جیمز اینڈ جیولرز ایسوسی ایشن نے اعلان کیا ہے کہ پاکستان میں سونے کی فی تولہ (24Kt) قیمت میں 6,100 روپے کا اضافہ ہوا ہے جو کہ 356,100 […]