ٹنڈوالہیار میں غذائی قلت کے خاتمے کے لیے ضلعی کوآرڈینیشن کمیٹی کا اجلاس

 ٹنڈوالہیار، 9 مئی (پی پی آئی) ڈپٹی کمشنر ٹنڈوالہیار نور مصطفی لغاری کی زیر صدارت ضلعی کوآرڈینیشن کمیٹی کا ایک اجلاس منعقد ہوا، جس میں ضلعی سطح پر غذائی قلت کے خاتمے کے منصوبوں کی کارکردگی کا جائزہ لیا گیا اور آئندہ کے لائحہ عمل پر غور کیا گیا۔اجلاس کا انعقاد کانفرنس ہال ڈپٹی کمشنر آفس ٹنڈوالہیار میں کیا گیا، جہاں ڈپٹی کمشنر نے حاملہ خواتین اور بچوں میں غذائی قلت کے خاتمے کی اہمیت پر زور دیا۔ اجلاس میں ایڈیشنل ڈپٹی کمشنر ون محمد ابراھیم عالمانی، ایڈیشنل ڈپٹی کمشنر ٹو ساجد علی پہوڑ، اسسٹنٹ کمشنر چمبڑ حماد علی زرداری سمیت مختلف محکموں کے افسران اور این جی اوز کے نمائندوں نے شرکت کی۔ڈپٹی کمشنر نے صحت سے متعلق منصوبوں پر مؤثر عملدرآمد کی اہمیت پر روشنی ڈالتے ہوئے کہا کہ متعلقہ محکمے اپنی کوششوں کو مزید فعال بنائیں۔ ضلعی کوآرڈینیشن کمیٹی کے ایسیلیریٹڈ ایکشن پلان کے فوکل پرسن خاوند سیال نے محکمہ پلاننگ اینڈ ڈویلپمنٹ کی جانب سے کیے گئے اقدامات کی تفصیلی بریفنگ دی۔اجلاس میں مشترکہ کوششوں کی ضرورت پر زور دیتے ہوئے این جی اوز اور مختلف محکموں کے ایک ساتھ کام کرنے کی حکمت عملی پر اتفاق کیا گیا۔ ڈپٹی کمشنر نے افسران کو ہدایت کی کہ وہ اپنی فعال شرکت کو یقینی بنائیں تاکہ غزائی قلت کا خاتمہ ممکن بنایا جا سکے۔