بھارت کے آزاد کشمیر اور پاکستان کی شہری آبادی پر حملے کیخلاف میرپور میں ریلی

مظفرآباد، 8مئی (پی پی آئی)صدر ریاست آزاد جموں و کشمیر بیرسٹر سلطان محمود چوہدری کی کال پر آج میرپور میں ایک اہم ریلی کا انعقاد کیا گیا، جس کی قیادت وزیر توانائی چوہدری ارشد حسین اور وزیر فزیکل پلاننگ و ہاؤسنگ چوہدری یاسر سلطان نے کی۔ ریلی قائد اعظم اسٹیڈیم میرپور سے چوک شہیداں تک نکالی گئی، جس میں میرپور کی تمام سیاسی جماعتوں، سول سوسائٹی اور مختلف مکاتب فکر کے افراد نے شرکت کی۔ شرکانے پاک فوج کے حق میں نعرے بازی کی اور اس کے ساتھ مکمل یکجہتی کا اظہار کیا۔ریلی سے خطاب کرتے ہوئے وزیر توانائی چوہدری ارشد حسین، وزیر فزیکل پلاننگ و ہاؤسنگ چوہدری یاسر سلطان، چیئرمین ضلع کونسل میرپور راجہ نوید اختر گوگا، اور میئر میونسپل کارپوریشن میرپور چوہدری عثمان خالد نے بھارت کے آزاد کشمیر اور پاکستان کی شہری آبادی پر حملے کی مذمت کی۔مقررین نے چیف آف آرمی سٹاف جنرل عاصم منیر اور پاک فوج کے جوانوں کو حملے کا جواب دینے پر خراج تحسین پیش کیا۔ انہوں نے اس عزم کا اظہار کیا کہ آزاد کشمیر کا ہر فرد پاک فوج کے ساتھ میدان جنگ میں لڑے گا، اگر بھارت نے جنگ مسلط کی۔اس موقع پر اقوام متحدہ اور عالمی برادری سے مطالبہ کیا گیا کہ وہ مسئلہ کشمیر کے حل کے لئے اقدام کریں۔