بدین میں جاری پبلک ہیلتھ منصوبوں کی کارکردگی پر غور و خوض

بدین،13مئی (پی پی آئی) وزیر اعلیٰ سندھ کے پبلک ہیلتھ انجینئرنگ و رورل ڈیولپمنٹ ڈیپارٹمنٹ کے اسپیشل اسسٹنٹ، محمد سلیم بلوچ نے بدین میں جاری پبلک ہیلتھ منصوبوں کی کارکردگی پر غور کرنے کے لیے اہم اجلاس منعقد کیا۔ اجلاس میں ضلع کے ایم پی ایز، ریونیو افسران اور پبلک ہیلتھ کے افسران شریک ہوئے۔اجلاس کے دوران اسپیشل اسسٹنٹ نے چیئرمین پاکستان پیپلزپارٹی بلاول بھٹو زرداری کے ویڑن کے تحت صاف پانی کی فراہمی کی اہمیت پر زور دیا اور مختلف اضلاع کے دوروں کے حوالے سے آگاہ کیا۔ بدین میں کیے گئے اجلاس میں ضلع کی واٹر سپلائی اسکیموں، فلٹر پلانٹس، آر او پلانٹس اور ڈرینج سسٹم کی تفصیلات پیش کی گئیں۔پریس ریلیز کے مطابق، کئی فلٹر پلانٹس اور آر او پلانٹس معمولی مرمت نہ ہونے کی وجہ سے غیر فعال ہیں۔ اسپیشل اسسٹنٹ نے اس پر برہمی کا اظہار کیا اور پبلک ہیلتھ کے افسران کو کارکردگی بہتر بنانے کی ہدایت دی۔ انہوں نے خبردار کیا کہ اگر کوئی شکایت موصول ہوئی تو سخت کارروائی کی جائے گی۔اجلاس میں شامل اراکین اسمبلی نے محکمہ پبلک ہیلتھ کے بعض افسران کے خلاف شکایات پیش کیں، جن میں دفتر سے غیر حاضری، لاپرواہی اور کرپشن کے الزامات شامل تھے۔ شہریوں کی جانب سے بھی صاف پانی کی عدم دستیابی اور ڈرینج سسٹم کی خستہ حالی کی شکایات کی گئیں۔۔اسپیشل اسسٹنٹ نے یقین دہانی کرائی کہ بند پلانٹس کی بحالی کے لیے مطلوبہ فنڈز فراہم کیے جائیں گے اور مقامی کمیونٹی کو ان منصوبوں کی نگرانی میں شامل کیا جائے گا۔ اجلاس میں مزید کہا گیا کہ ہر دو ماہ بعد اسکیموں کی پیشرفت کا جائزہ لیا جائے گا۔