احتجاجی مظاہرہ: تحریک انصاف کے رہنما اسلام آباد ہائیکورٹ کے سامنے سراپا احتجاج

اسلام آباد، 21 مئی (پی پی آئی)پاکستان تحریک انصاف کے اراکین قومی و صوبائی اسمبلی، ٹکٹ ہولڈرز اور کارکنان نے اسلام آباد ہائیکورٹ کے سامنے جمع ہو کر عمران خان کو انصاف کی فراہمی کا مطالبہ کیا۔آج اڈیالہ میں عمران خان کے توشہ خانہ 2 کے کیس کا ٹرائل شروع ہوا جس میں علیمہ خان نے بتایا کہ عمران خان نے جج سے احتجاج کیا کہ ان کی فیملی کو اندر جانے سے روکا گیا۔علیمہ خان نے میڈیا سے بات کرتے ہوئے کہا کہ عمران خان نے کہا ہے کہ قومی اتحاد دہشتگردی کے خلاف اور معیشت کی بہتری کے لئے ضروری ہے۔القادر ٹرسٹ کیس کی اپیل کی سماعت کے موقع پر پی ٹی آئی کے رہنماؤں نے مطالبہ کیا کہ عمران خان پر جتنے بھی کیس ہیں ان کی جلد سماعت کی جائے۔عامر ڈوگر نے کہا کہ ہم آج تمام ممبران اسمبلی کے ساتھ یہ مطالبہ لے کر آئے ہیں کہ عمران خان اور تحریک انصاف کو انصاف دیا جائے۔اسلام آباد ہائیکورٹ کے باہر مظاہرین نے واضح کیا کہ وہ اپنے مطالبات سے پیچھے نہیں ہٹیں گے، جبکہ اسد قیصر نے عدلیہ اور ججز کے وقار کو برقرار رکھنے پر زور دیا۔پی ٹی آئی سندھ کے صدر حلیم عادل شیخ نے کہا کہ سندھ سے تقریباً 110 امیدواران بھی اسلام آباد پہنچے جن میں سے 51 کراچی اور حیدرآباد سے ہیں۔