اسلام آباد،29 مئی (پی پی آئی) آزاد جموں و کشمیر کے صدر بیرسٹر سلطان محمود چوہدری نے مسئلہ کشمیر کے حل اور مقبوضہ کشمیر میں انسانی حقوق کی پامالی رکوانے کے لئے سفارتی سطح پر کوششیں تیز کر دی ہیں۔
انہوں نے پاکستان میں تعینات یورپی یونین کی سفیر اور امریکی سفارتکاروں کے وفد سے ملاقاتیں کیں، جن میں مسئلہ کشمیر کے حل اور بھارتی ظلم و بربریت کے خاتمے پر زور دیا گیا۔
اسی سلسلے میں، صدر آزاد جموں و کشمیر نے ایوان صدر کشمیر ہاؤس اسلام آباد میں آسٹریا کی سفیر مسز اینڈریا ویکی سے تفصیلی ملاقات کی۔ انہوں نے آسٹریا سے مسئلہ کشمیر کے حل میں کردار ادا کرنے کی اپیل کی، کیونکہ آسٹریا کا انسانی حقوق پر اچھا ریکارڈ ہے۔
صدر چوہدری نے آسٹریا اور دیگر یورپی ممالک کو پاک بھارت ثالثی میں کردار ادا کرنے کی تجویز دی، تاکہ جنوبی ایشیاء میں امن قائم ہو سکے۔ انہوں نے اقوام متحدہ کی قراردادوں کے مطابق کشمیری عوام کو حق خودارادیت دلانے کی ضرورت پر بھی زور دیا۔
اس موقع پر آسٹریا کی سفیر نے پاک بھارت سیز فائر کو خوش آئند قرار دیا اور خطے میں قیام امن کے لئے آسٹریا کی کوششوں کو جاری رکھنے کا عزم دہرایا۔ ملاقات میں باہمی دلچسپی کے دیگر امور پر بھی تبادلہ خیال ہوا۔