لاہور: قومی کرکٹ ٹیم کے کپتان مصباح الحق نے تیسرے ون ڈے میں 79 رنز بنا کر کئی ریکارڈ توڑ دیئے۔ کپتان نے رواں سال نصف سنچریاں بنانے کا قومی ریکارڈ توڑ دیا جبکہ عالمی ریکارڈ برابر کر دیا۔ سال میں سب سے زیادہ نصف سنچریاں بنانے کا قومی ریکارڈ یونس خان جبکہ عالمی ریکارڈ گیری کرسٹن اور سچن ٹنڈولکر کے پاس تھا۔ سینچورین میں کھیلے گئے تیسرے ون ڈے میں بلے بازوں کے فلاپ ہونے کے بعد کپتان مصباح الحق نے ذمہ دارانہ بیٹنگ کا مظاہرہ کرتے ہوئے 79 رنز کی اننگز کے دوران کئی سنگ میل عبور کئے اور کئی منزلوں کے قریب پہنچ گئے۔ مصباح الحق نے رواں سال تیرہ نصف سنچریاں سکور کرکے سال میں سب سے زیادہ نصف سنچریاں بنانے کا قومی ریکارڈ قبضے میں کیا جبکہ عالمی ریکارڈ برابر کر دیا۔ قومی ریکارڈ یونس خان کے پاس جبکہ عالمی ریکارڈ کے مالک گیری کرسٹن اور سچن ٹنڈولکر تھے۔ مصباح الحق سال میں ون ڈے میں سب سے زیادہ رنز بنانے والے کھلاڑیوں میں بھی دوسرے نمبر پر آ گئے ہیں جبکہ ٹاپ پوزیشن پر موجود ویرات کوہلی سے چودہ رنز کی دوری پر ہیں۔ مصباح سال میں چوبیس چھکے لگا کر سب سے زیادہ چھکے لگانے والوں کی فہرست میں تیسرے نمبر پر آ گئے ہیں۔ جارج بیلی اور روہت شرما تیس چھکوں کے ساتھ بالترتیب دوسرے اور تیسرے نمبر پر ہیں۔

لاہور: جونیئر ہاکی ورلڈ کپ میں شرکت کیلئے قومی ٹیم واہگہ کے راستے بھارت روانہ ہو گئی،کپتان عمر بھٹہ کا کہنا تھا کہ ٹورنامنٹ جیت کر قوم کو خوشی دیں گے۔چھ دسمبر سے نئی دہلی میں شروع ہونے والے ہاکی ورلڈ کپ میں شرکت کیلئے پاکستانی ٹیم بھارت روانہ ہوئی۔روانگی سے پہلے میڈیا سے گفتگو کرتے ہوئے جونئیر ہاکی ٹیم کے کوچ منظور الحسن نے کہا کہ ٹورنامنٹ کے ابتدائی میچز کافی اہمیت کے حامل ہیں۔کوچ منظور الحسن نے کہا کہ سینئرز کے ساتھ پریکٹس کے بعد کھلاڑیوں کے حوصلے کافی بلند ہیں۔کپتان عمر نے کہا کہ ہر میچ کو فائنل سمجھ کر کھیلیں گے،لڑکوں نے بہت محنت کی ہے،جیت کیلئے پر امید ہیں،کپتان عمر بھٹہ نے کہا کہ تمام کھلاڑی مکمل فارم میں ہیں۔

بیونس آئرس: ارجنٹائن فٹ بال لیگ میں بوکا جونیئرز اور لانوس کی ٹیموں کے درمیان میچ دو دو گول سے برابر ہو گیا۔ارجنٹائن میں کھیلے گئے فٹ بال میچ میں دونوں ٹیموں کے درمیان سخت مقابلہ ہوا ،کھیل کے 23ویں منٹ میں میزبان ٹیم لانوس کے کھلاڑی گلوریمو نے پہلا گول کر کے ٹیم کو ایک صفر کی برتری دلائی ، بوکا کی جانب سے سٹرائیکر ایمانوئیل نے گول سکور کر کے حساب برابر کیا۔لانوس کے نے باسٹھویں منٹ میں شاندار کک لگا کر گیند جال میں پھینکی اور برتری دو ایک کی لیکن اس کے تین منٹ بعد ہی بوکا کے کھلاڑی نے سنسنی خیز گول کر کے مقابلہ دوبارہ برابر کر دیا جو میچ کے اختتام تک برقرار رہا ،لیگ میں لانوس کی ٹیم دوسری پوزیشن پر ہے۔

بیونس آئرس: عالمی نمبر ایک امریکی ٹینس اسٹار سرینا ولیمز نے اپنی بہن وینس ولیمزکے ساتھ نمائشی میچ کھیلا۔ارجنٹائن کے شہر بیونس آئرس میں دونوں بہنوں نمائشی میچ میں حصہ لیا،دلچسپ مقابلے کو دیکھنے کے لیے شائقین کی بڑی تعداد نے ایونٹ میں شرکت کی۔وینس ولیمز ڈانس کرتے ہوئے کورٹ میں داخل ہوئیں تو انکے منفرد انداز سے مداح محظوظ ہوئے۔عالمی نمبر ایک سرینا ولیمز نے 15 سالہ ٹینس کیرئیر میں 17 گرینڈ سلیم ٹائٹل اپنے نام کیے جبکہ ان کی بہن وینس سات بار اعزاز حاصل کر چکی ہیں۔

ہیمبرگ: جرمن فٹ بال لیگ میں بائرن میونخ اور بروشیا ڈورٹمنڈ کی ٹیموں نے اپنے اپنے میچز جیت لیے۔جرمنی میں جاری فٹ بال ایونٹ میں دلچسپ مقابلے ہوئے میزبان ٹیم میونخ نے برانشویگ کو صفر کے مقابلے میں دو گول سے شکست دی،فاتح ٹیم کی جانب سے دونوں گول سٹرائیکر آرجن روبن نے سکور کیے،اس کامیابی کے بعد میونخ کی ٹیم نے لیگ میں اپنی ٹاپ پوزیش بھی مستحکم بنا لی ہے۔فٹ بال لیگ کے ایک اور میچ میں ڈورٹمنڈ کی ٹیم نے بھی مہمان مینز کو یکطرفہ مقابلے میں مات دی ، ڈورٹمنڈ کی کامیابی کا سکور تین ایک رہا۔