کویت (پی پی آئی) کویت نے غیر ملکی شہریوں پر یوٹیلٹی بلز کی ادائیگی کے بغیر ملک چھوڑنے پر پابندی عائد کردی ہے۔پی پی آئی کے مطابق  غیر ملکی شہریوں کو کویت چھوڑنے سے پہلے پانی، بجلی اور ٹریفک جرمانے ادا کرنے کا پابند کیا جائے گا۔کویت  میں مقیم پاکستانیوں نے تصدیق کی ہے کہ غیر ملکی شہریوں کو کسی بھی وجہ سے ملک سے باہر جانے سے قبل ٹریفک جرمانہ سمیت تمام واجبات ادا کنے پڑیں گے۔۔اس مقصد کیلئے ایک آن لائن پلیٹ فارم تیار کیا گیا ہے جہاں بلوں کی ادائیگی کی جاسکتی ہے۔

کراچی (پی پی آئی) وفاقی تحقیقاتی ادارے ایف آئی اے نے انسانی اسمگلنگ پر قابو پانے کیلئے کراچی ائیر پورٹ  پر نصب انٹیگریٹیڈ بارڈر مینجمنٹ سسٹم کو محکمہ پاسپورٹ اور نادرا سے منسلک کردیا ہے۔ اب کسی بھی مشکوک، مطلوب یا اشتہاری شخص کیلئے ملک سے فرار آسان نہیں رہے گا۔پی پی آئی کے مطابق آئی بی ایم ایس میں 22 کروڑ سے زائد مسافروں کا ریکارڈ محفوظ ہے،۔ایف آئی اے نے 34 بارڈر کراسنگ پوائنٹس پر 3 مراحل میں چیکنگ کا نظام بھی قائم کردیا۔ وفاقی ادارے نے ایک سال کے دوران شک کی بنیاد پر 19 ہزار 55 افراد کو سفر کرنے سے روکا۔ایف آئی اے حکام کے مطابق 388 مسافروں کو جعلی اور غیر قانونی دستاویزات پرآف لوڈ کیا گیا، غیرقانونی طور پر بارڈر کراس کرنیوالے 968 افراد کو بھی پکڑا گیا۔

کراچی (پی پی آئی)پاکستان ٹیلی کمیونی کیشن کمپنی لمیٹڈ (پی ٹی سی ایل) اور چائلڈ لائف فاؤنڈیشن نے پاکستان بھر میں 200 سے زائد ٹیلی میڈیسن سیٹلائٹ اور ایمرجنسی سینٹرز میں ریموٹ ٹیلی میڈیسن سہولیات کو ٹیلی کام سروسز کی فراہمی کے لئے باہمی اشتراک قائم کرلیا ہے۔پی پی آئی کے مطابق پی ٹی سی ایل اور یوفون 4G کے گروپ چیف بزنس سلوشن آفیسر،ضرار ہشام خان اور چائلڈ لائف فاؤنڈیشن کے سی ای او، ڈاکٹر احسان ربانی نے حال ہی میں سول اسپتال کراچی میں چائلڈ لائف فاؤنڈیشن کے ایمرجنسی سینٹر میں منعقدہ تقریب کی صدارت کی۔ اس موقع پر پی ٹی سی ایل کے گروپ وی پی بشارت قریشی، پی ٹی سی ایل انٹرپرائز کے گروپ ڈائریکٹر عمر فاروقی، چائلڈ لائف فاؤنڈیشن کے جنرل منیجر انفارمیشن ٹیکنالوجی،سید علی حسین اور  جنرل منیجر، کمیونیکیشنز چائلڈ لائف فاؤنڈیشن شہزاد ذکی بھی موجود تھے۔ پی ٹی سی ایل چائلڈ لائف فاؤنڈیشن کو جدید ترین کنیکٹیویٹی سلوشنز فراہم کر رہا ہے جو جدید ترین ٹیکنالوجی اور منظم خدمات سے لیس ہیں۔ تقریب کے دوران پی ٹی سی ایل اور یوفون 4G کے گروپ چیف بزنس سلوشن آفیسر ضرار ہشام خان نے کہا، ”ہم اپنے ملک کے بچوں کی مدد کے لیے چائلڈ لائف فاؤنڈیشن کے ساتھ شراکت داری پر فخر محسوس کرتے ہیں۔ پی ٹی سی ایل ایک قومی کمپنی ہونے کے ناطے پاکستان بھر میں ڈیجیٹلائزیشن کی کوششوں کی قیادت کر رہی ہے۔ اس طرح کی شراکت داریوں کے ذریعے صحت کے شعبے میں جدید اور محفوظ سہولیات کی فراہمی کے لیے  پی ٹی سی ایل  ٹیلی کام انفراسٹرکچر  کی تعمیر  کیذریعے  ملک کی مجموعی سماجی ترقی میں اپنا کلیدی کردار جاری رکھے گی۔“ اس موقع پر چائلڈ لائف فاؤنڈیشن کے سی ای او، ڈاکٹر احسان ربانی نے کہا،”پی ٹی سی ایل کے ساتھ شراکت داری پسماندہ علاقوں میں صحت کی دیکھ بھال کے خلا کو پر کرنے کے لئے ٹیکنالوجی کے استعمال میں ایک اہم پیش رفت ہے۔ پی ٹی سی ایل کی  مواصلاتی سہولیات سے چلنے والے یہ ٹیلی میڈیسن سیٹلائٹ سینٹرز دور دراز کی کمیونٹیز کو بچوں کے ڈاکٹروں کی مشاورت تک رسائی فراہم کریں گے  اور معیاری صحت کی دیکھ بھال کی راہ میں حائل  رکاوٹوں کو دور کرتے ہیں۔ چائلڈ لائف کا مقصد اس بات کو یقینی بنانا ہے کہ جغرافیائی فاصلوں کی وجہ سے  بچے کی صحت پر سمجھوتہ نہ کرنا پڑے۔ ہمارا باہمی  تعاون جدت طرازی اور قابل رسائی صحت کی دیکھ بھال کے ذریعے مثبت تبدیلی لانے کے  عزم کا عکاس  ہے۔“پی ٹی سی ایل اور چائلڈ لائف فاؤنڈیشن پاکستان بھر میں بچوں کو بہترین ہنگامی صحت کی خدمات فراہم کرنے کے عزم رکھتے  ہیں۔ یہ معاہدہ آئی سی ٹی اور سیکیورٹی سلوشنز کے متنوع شعبوں میں تیز رفتار ترقی کا مظہر  ہے جو پاکستان میں ڈیجیٹل ایکو سسٹم کی بنیاد  ہے۔