اسلام آباد)پی پی آ ئی) پیپلز پارٹی کے سینئر رہنما نیئر بخاری نے ملک میں عام انتخابات کے بروقت انعقاد کا مطالبہ کرتے ہوئے کہا ہے کہ جنوری میں انتخابات نہ ہوئے تو پیپلزپارٹی سڑکوں پر نکلے گی اور دھرنا دے گی۔ میڈیا رپورٹس کے مطابق پیپلزپارٹی کے سیکریٹری جنرل رہنما نیئر حسین بخاری نے پاکستان ڈیموکریٹک موومنٹ (پی ڈی ایم) کے صدر اور جمعیت علمائے اسلام (ف) کے سربراہ مولانا فضل الرحمٰن کے الیکشن کے انعقاد کے حوالے سے تحفظات پر کہا کہ مولانا فضل الرحمٰن سے سوال ہے کہ ملک کون سنبھالے گا؟ مولانا فضل الرحمٰن صاحب کے پاس ملک کو چلانے کا کون سا فارمولا ہے؟ ہمارے پاس تو آئین کے مطابق الیکشن کا ہی فارمولا ہے، اس لیے الیکشن وقت پر ہونے چاہیں، اگر جنوری میں انتخابات نہ ہوئے تو پیپلزپارٹی سڑکوں پر نکلے گی، دھرنا ڈی چوک پر ہوگا یا کہیں اور اس کا فیصلہ بعد میں پارٹی کرے گی۔اسی طرح سینیٹر رضا ربانی نے بھی انتخابات کی فوری تاریخ کا اعلان کرنے کا مطالبہ کردیا، انہوں نے کہا کہ ملک میں انتخابات کی تاریخ کا فوری اعلان کیا جائے، الیکشن کمیشن پہلے ہی 90 روز میں انتخابات نہ کراکے آئین کی خلاف ورزی کرچکا ہے، اب الیکشن کمیشن کے پاس انتخابات میں تاخیر کے لیے حلقہ بندیوں کا جواز بھی نہیں رہا، انتخابات میں تاخیر سیاسی اور معاشی غیر یقینی کو بڑھا رہی ہے۔

ادھر پاکستان مسلم لیگ ن کے مرکزی رہنماء راجہ ریاض نے کہا ہے کہ حلقہ بندیوں پر اعتراضات ہورہے ہیں الیکشن جنوری میں نہیں ہوں گے، الیکشن فروری کے درمیان میں ہوں گے، کوئی تاخیر نہیں ہورہی، فروری میں الیکشن کیلئے مولانا فضل الرحمان بھی مان جائیں گے، پیپلزپارٹی سندھ میں نگران حکومت کے مزے لوٹ رہی ہے لیکن اسمارٹ گیم کھیل کر تاثر دے رہی کہ وہ اپوزیشن ہے، پیپلزپارٹی 16ماہ کی حکومت سے خود کو الگ کرنے کی کوشش کررہی ہے، مردم شماری پر دستخط کا واضح مطلب تھا کہ حلقہ بندیاں ہوں گی، پیپلزپارٹی عوام میں تاثر دے رہی کہ وہ فوری الیکشن چاہتی ہے، پیپلزپارٹی نے بھی مردم شماری پر دستخط کئے الیکشن میں تاخیر تو ہونی تھی، پیپلزپارٹی عوام میں کچھ تاثر دے رہی درپردہ کچھ اور بات ہے۔

کراچی)پی پی آ ئی)فلم ان فلیمز نے انٹرنیشنل ساؤتھ ایشین فلم فیسٹیول کینیڈا میں بہترین فیچر کا ایوارڈ جیت لیا۔کینیڈا میں ہونیوالے انٹرنیشنل ساؤتھ ایشین فلم فیسٹیول میں بہترین فیچر فلم کا ایوارڈ جیتنے والی پاکستانی فلم ان فلیمز نے پاکستانی سینما کی عالمی سطح پر نمائندگی کی ہے۔فلم کے آفیشل انسٹاگرام اکاؤنٹ پر ضرار خان اور محمد علی ہاشمی نے خوشی کا اظہار کیا اور مداحوں کو آگاہ کرتے ہوئے لکھا کہ ہم نے بہترین فیچر کا ایوارڈ جیتا ہے، اس شاندار اعزاز کیلئے آئی ایس اے ایف ایف کا شکریہ۔انہوں نے مزید لکھا کہ اس ایوارڈ کی بہت زیادہ اہمیت ہے، ہم کینیڈا اور پوری دنیا میں جنوبی ایشیائی فلم میکنگ کمیونٹی کا حصہ بننے پر بہت شکر گزار ہیں، یہ ایوارڈ ہماری پوری ٹیم کیلئے ہے۔فلم ان فلیمز کی کہانی ماں اور بیٹی کے گرد گھومتی ہے جو گھر کے مرد سرپرست کی موت کے بعد زندگی کو آگے بڑھانے کے دوران مشکلات اور مسائل کا سامنا کرتی ہیں۔فلم میں کوئی بھی گلیمر یا گانا موجود نہیں، اس کی کہانی انتہائی سادہ مگر آرٹ سے بھرپور رکھی گئی ہے جو دیکھنے والوں کو اپنے ساتھ جڑے رہنے پر مجبور کرتی ہے۔فلم کا سکرپٹ ضرار خان نے لکھا اور انہوں نے ہی اس کی ہدایات دی ہیں، فلم کی مکمل شوٹنگ کراچی میں ہوئی اور اس کی کاسٹ میں شامل زیادہ اداکار بھی سندھ سے تعلق رکھتے ہیں، فلم کی مرکزی اداکارہ بختاور مظہر پلیجو ہیں جو کہ سابق وزیر ثقافت سندھ سسی پلیجو کی بہن ہیں۔

کراچی)پی پی آ ئی) چیئرمین شاہ فیصل ٹاؤن گوہر علی خٹک کی خصوصی ہدائت پر ایک کمیٹی تشکیل دی گئی جن میں ٹاؤن میونسپل کمشنر شاہ فیصل ٹاؤن اقبال امتیاز پھلپوٹو، وائس چیئرمین شاہ فیصل ٹاؤن طارق محمود،اکاؤنٹ آفیسر ندیم شیخ،بلدیاتی نمائند گان میں خالدسدھو،عبدالرحمن،زین خان سواتی،عارف زمان اور نور اللہ پر مشتمل کمیٹی نے شاہ فیصل ٹاؤن کے تمام ملازمین کی صاف اور شفاف ویری فیکیشن کی اس موقع پر وائس چیئرمین شاہ فیصل ٹاؤن طارق محمود نے کہا شناختی پریڈ کا مقصد شاہ فیصل ٹاؤن کے ملازمین پر جو اضافی بوجھ ہے اس کو دور کیا جائے اور اس طرح ہم ملازمین کے مسائل کو صفر کرنے میں کامیاب ہوجائے گے۔اس موقع پر ٹاؤن میونسپل کمشنر اقبال امتیاز پھلپوٹو نے کہا کے اس ویری فیکیشن کے عمل میں جس طرح شاہ فیصل کے افسران و ملازمین نے جس طرح ہمارے ساھ تعاؤن کیا ہے وہ ایک قابل تعریف عمل ہے اور ہفتہ اتوار چھٹی کے باوجود ویری فیکیشن کا عمل جاری ہے تاکہ ملازمین کو تنخواہ ٹائم پر دی جائے جو کہ ویری فیکیشن کی وجہ سے تاخیر ہوئی ہے مگر انشااللہ اب آنے والے ماہ میں تنخواہ وقت پر ہوگی اس موقع پر چیئرمین شاہ فیصل ٹاؤن گوہر علی خٹک نے شناختی پریڈ پر آئے ہوئے محکمہ تعلیم کے ملازمین سے ملاقات کی اور کہا کے ہمارے درمیان جو گھوسٹ ملازمین ہماری صف میں شامل ہوگئے ہیں آپ لوگ ان کی نشاندھی کرے تاکہ ہم ان کے خلاف کاروائی کرسکے اور یہ دو نمبر ملازمین آپ کا حق کھا رہے ہیں جو آپ کے لئے شدید نقصان دہ ہے اور انہوں نے ویری فیکیشن کمیٹی سے بھی ملاقات کی اور ان کے کام کی تعریف کرتے ہوئے کہا کے جس طرح آپ لوگ آج چھٹی کے دن اپنے گھر بچوں کو چھوڑ کر یہاں ڈیوٹی سرانجام دے رہیں ہیں اس کی جتنی بھی تعریف کی جائے کم ہے اور انہوں نے مزید کہا کے ویری فیکیشن کا عمل اپنے آخری مراحل میں داخل ہوگیا ہے یعنی کلا بروز پیر کو اس کا آخری دن ہے اس کے بعد ہم اولین ترجیحی ملازمین کی تنخواہ پر ہوگی جس کو جلد از جلد حل کیا جائے گا۔

اسلام آباد)پی پی آ ئی) الیکشن کمیشن نے عام انتخابات کے حوالے سے سیاسی جماعتوں کے ساتھ حتمی ضابطہ اخلاق پر مشاورت کا فیصلہ کر لیا۔  عام انتخابات سے متعلق مجوزہ ضابطہ اخلاق پر سیاسی جماعتوں کے نمائندے بدھ کو الیکشن کمیشن کو تجاویز دیں گے اور سیاسی جماعتوں سے مشاورت کے بعد حتمی ضابطہ اخلاق جاری کیا جائے گا، اس مقصد کے لیے چیف الیکشن کمشنر کے زیر صدارت اجلاس ہوگا۔ذرائع کا حوالہ دیتے ہوئے بتایا گیا ہے کہ مشاورتی اجلاس کے لیے تمام پارلیمانی سیاسی جماعتوں کو دعوت نامے ارسال کر دیئے گئے ہیں، الیکشن کمیشن کی جانب سے تمام سیاسی جماعتوں کو 88 نکات پر مشتمل مجوزہ ضابطہ اخلاق بھی بھجوا دیا گیا ہے۔ بتایا جارہا ہے کہ پاکستان پیپلز پارٹی کی جانب سے انتخابی قواعد میں ترمیم پر تحفظات کا اظہار کیا ہے، انتخابی قواعد میں ترمیم کے معاملے پر پیپلز پارٹی نے الیکشن کمیشن کو تحریری طور پر تحفظات سے آگاہ کر دیا، اس حوالے سے پی پی پی کے سکریٹری جنرل نیئر بخاری نے خط میں لکھا کہ جمہوریت، شفافیت اور قانون پر یقین رکھنے والا پاکستانی اور پارٹی سکریٹری جنرل ہوں، الیکشن۔کمیشن کی جانب سے الیکشن ایکٹ 2017 میں ترامیم کا جائزہ لیا ہے، ان ترامیم پر الیکشن کمیشن کو اہنے تحفظات سے آگاہ کرنا چاہتا ہوں۔ الیکشن کمیشن کے نام اپنے خط میں انہوں نے کہا کہ اگلے عام انتخابات کو صاف اور شفاف انداز میں منعقد کرانے کے لیے کمیشن کوششیں قابل تعریف ہیں، الیکشن کمیشن کی جانب سے مجوزہ فارم 68 میں ترامیم پر بہت سنجیدہ تحفظات اور اعتراضات ہیں، اس شق کے تحت انتخاہی امیدوار کو کیمپین فنانس رولز کے تحت اپنی پارٹی کے مکمل انتخابی اخراجات کی تفصیل فراہم کرنا ہوگی جب کہ الیکشن ایکٹ 2017 کے رول 161کے سب رول 3 کے تحت سیاسی جماعتوں کو انتخابی نتائج گزٹ نوٹی فکیشن کے 60 دن میں جمع کرانا ہیں۔پاکستان پیپلزپارٹی کی جانب سے کہا گیا ہے کہ نئی ترامیم کے تحت فارم 68 کے تحت کیمپین فنانس سب سیکشن 211/2 کے مطابق کامیاب امیدوار کو پولنگ کے 10 روز کے اندر اپنی پارٹی کے انتخابی اخراجات کی تفصیل دینا ہوگی جب کہ باقی تمام امیدواروں کو سیکشن 98, 124 اور 136 کے مطابق انتخابی اخراجات کی تفصیل 30 دن میں جمع کرانا ہوں گی۔ نیئر بخاری نے اپنے خط میں مزید لکھا ہے کہ پارٹی امیدواروں کے لیے شرط اور دیگر امیدواروں کے شرائط میں تضاد ہے اور ایسا کرنا ناممکن ہے، امیدوار وہ اطلاعات کیسے فراہمکر سکتے ہیں جو انہیں خود بھی نہ ملی ہوں، اپ سے درخواست ہے کہ الیکشن قواعد میں تجویز کردہ ان شرائط کے کالم کو ختم کیا جائے۔