لاہور(پی پی آئی) لاہور ہائیکورٹ نے بغیر ہیلمٹ موٹرسائیکل سواروں کو پیٹرول نہ دینے کا حکم معطل کر دیا۔پی پی آئی کے مطابق لاہور کی عدالت عالیہ میں موٹرسائیکل سواروں کو بغیر ہیلمٹ موٹرسائیکل سواروں کو پیٹرول نہ دینے کے خلاف کیس کی سماعت ہوئی۔ جسٹس راحیل کامران شیخ نے شہری عرفان بشیر کی درخواست پر سماعت کی۔ درخواست گزار نے موقف اپنایا کہ پیٹرول ایک بنیادی ضرورت بن چکا ہے۔ لاہور میں سب سے زیادہ افراد موٹرسائیکل پر سفر کرتے ہیں، عدالت عالیہ اس سے پہلے لگائی گئی پابندی کو ختم کرنے کا حکم دے چکی ہے۔ ڈپٹی کمشنر لاہور نے بغیر ہیلمٹ موٹر سائیکل سواروں کو پیٹرول نہ دینے کا نوٹیفکیشن دیا ہے۔ ڈپٹی کمشنر لاہور کا اقدام عدالتی حکم اور بنیادی حقوق کی خلاف ورزی ہے۔ موٹرسائیکل سواروں کو ہیلمٹ کی پابندی کروانا ٹریفک پولیس کا کام ہے۔ ہیلمٹ کے حوالے سے قانون پر ٹریفک پولیس کو اقدامات اٹھانے چاہیئں۔ عدالت ڈپٹی کمشنر لاہور کے جاری نوٹیفکیشن کو کالعدم قرار دے۔عدالت نے  وکلا کے دلائل سننے کے بعد ڈپٹی کمشنر لاہور کا حکم معطل کر دیا اور ڈی سی لاہور، آئی جی پنجاب اور سی سی پی او لاہور سے جواب طلب کر لیا۔

اسلام آباد (پی پی آئی) کورونا وبا کے دوران شہید ڈاکٹرز اور ہیلتھ ورکرز کو تمغہ امتیاز دینے کا فیصلہ کیا گیا ہے۔پی پی آئی کے مطابق وزیراعظم شہباز شریف نے کورونا کے دوران ڈاکٹروں اور فرنٹ لائن ہیلتھ ورکرز کی خدمات کا اعتراف کیا ہے، ان کا کہنا ہے کہ پوری قوم فرض شناس ڈاکٹرز اور فرنٹ لائن ہیلتھ ورکرز کی مقروض رہے گی،ڈاکٹرز اور فرنٹ لائن ہیلتھ ورکرز کے اہلخانہ قوم کا فخر ہیں۔ پنجاب سے 81، سندھ سے 87ڈاکٹرز کو تمغہ امتیاز دیا جائے گا،خیبرپختونخوا سے 23، بلوچستان سے 8ڈاکٹرز کو تمغہ امتیاز دیا جائے گا، آزادکشمیر سے 4، گلگت اور اسلام آباد سے ایک ایک ڈاکٹر کو تمغہ امتیاز دیا جائے گا، اس کے علاوہ پاکستان بھر سے 59نرسوں اور فرنٹ لائن ہیلتھ ورکرز کو بھی تمغہ امتیاز سے نوازا جائے گا۔

کراچی(پی پی آئی) یوٹیلیٹی  اسٹورزپر چینی  کی قلت کو3ماہ گزرگئے،3ماہ گزرنے کے باوجودیوٹیلیٹی سٹورزکارپوریشن کے سرپر جوں تک نہ رینگی۔قطاروں میں لگے صارفین دھوپ میں اشیائے ضروریہ خریدنے پر مجبور ہو گئے،شہریوں کا کہنا ہے کہ چینی نہ ملنے اور آٹے کی دستیابی بھی قسمت پر منحصر ہوتی ہے، ہول سیل میں چینی کی 50 کلو کی بوری 150 روپے مہنگی ہوگئی،ہول سیل میں چینی کی 50 کلو بوری 7100 روپے سے بڑھ کر 7250روپے پر پہنچ گئی،ہول سیل میں فی کلو چینی 3 روپے مہنگی کردی گئی،ہول سیل میں چینی 142 روپے سے بڑھ کر 145 روپے فی کلو پر پہنچ گئی۔ پی پی آئی کے مطابق شوگر مافیا بے لگا م ہے،کوئی روکنے والے نہیں،نہ آٹے کی قیمت کنٹرول ہوپارہی ہے اور نہ ہی چینی کی قیمتوں کو کوئی کنٹرول کرپارہا ہے۔