اسلام آباد (پی پی آئی) خاتون ہراسگی کیس میں سابق نادرا ملازم کی نوکری پر بحالی کی درخواست خارج  کر دی گئی۔ سپریم کورٹ نے درخواست واپس لینے کی بنیاد پر خارج کی۔ چیف جسٹس قاضی فائز عیسی کی سربراہی میں تین رکنی بنچ نے سماعت کی۔پی پی آئی کے مطابق  چیف جسٹس کا کہنا تھا کہ نادرا کے پاس قانونی اختیارات ہیں اس معاملے پر رٹ نہیں کرسکتے۔ لاہور ہائیکورٹ پہلے ہی آپ کی درخواست خارج کرچکی ہے۔  درخواست گزار کے وکیل نے بتایا کہ ہمیں صرف الزام کی بنیاد پر نوکری سے برخاست کیا گیا شواہد موجود نہیں۔ جس پر چیف جسٹس نے استفسار کرتے ہوئے کہا کہ معاملہ کیا تھا انکوائری کس بنیاد پر ہوئی۔وکیل کی جانب سے کہا گیا کہ ایک کسٹمر خاتون کو واٹس ایپ میسج کئے لیکن کوئی  اسکرین شاٹ پیش نہیں کیا گیا۔ آپ ہماری درخواست مسترد نہ کریں ہم واپس لے لیتے ہیں۔ یاد رہے کہ سیالکوٹ میں نادرا کے جونیئر ایگزیکٹو افسر کو صارف خاتون کو وٹس ایپ میسج کرنے پر ملازمت سے برخاست کیا گیا۔

کراچی (پی پی آئی)حکومت کی جانب سے ڈالر کے ذخیرہ اندوزوں، بلیک مارکیٹنگ میں ملوث افراد اور اسمگلرز کیخلاف کارروائی کے بعد ملکی ترسیلات زر میں 10 سے20 فیصد تک اضافہ کی توقع ہے،پی پی آئی کے مطابق حالیہ کارروائی میں ڈالر اسمگلرز، بلیک مارکیٹنگ اور بینکوں کا گٹھ جوڑ سامنے آیا ہے۔ کریک ڈاون سے قبل ایکسچینج کمپنیوں کو روزانہ 5 ملین ڈالرز ملتے تھے لیکن اب انہیں 15 ملین ڈالرز مل رہے ہیں یعنی اس میں 200 فیصد اضافہ ہوا ہے، یہی وجہ ہے کہ انٹر بینک اور اوپن مارکیٹ کے ریٹس میں نمایاں کمی آئی ہے اور فی ڈالر 295 روپے کا ہوگیا ہے، کہا جارہا ہے کہ اگر کارروائی جاری رہی تو ڈالر 235 روپے  تک آجائے گا۔

کراچی (پی پی آئی)متحدہ عرب امارات (یو اے ای)نے پاکستانی تازہ گوشت کی سمندری راستے سے امپورٹ بند کردی ہے۔پی پی آئی کے مطابق  ذرائع کا کہنا ہے کہ کراچی کی ایک کمپنی کے کنٹینر سے گوشت میں فنگس پایا گیا تھا  جس پر یو اے ای حکام نے پاکستانی تازہ گوشت کی سمندری راستے سے امپورٹ بند کردی،پی پی آئی کے مطابق   یو اے ای کی طرف سے امپورٹ پر عائد پابندی کا اطلاق 10اکتوبر سے ہوگا۔یو اے ای حکام کا کہنا ہے کہ امپورٹ پابندی میں مرغی  کا چلڈ گوشت بھی شامل ہے،ایکسپورٹرز کا کہناتھاکہ سمندری راستے سے ماہانہ پاکستانی گوشت کی ایکسپورٹ ایک کروڑ20لاکھ ڈالر تھی،ہوئی جہاز سے ایکسپورٹ کی لاگت زیادہ ہے،ایکسپورٹر نے مطالبہ کیا ہے کہ پاکستانی حکومت یو اے ای سے معاملہ اٹھائے۔

پشاور (پی پی آئی)پشاور ہائیکورٹ نے سابق ایم پی اے ظاہر شاہ طورو کو تھری ایم پی او کے تحت گرفتار نہ کرنے کا حکم دیدیا۔پی پی آئی کے مطابق پشاور ہائیکورٹ میں سابق ایم پی اے ظاہر شاہ طورو کے خلاف مقدمات کی تفصیلات کی فراہمی سے متعلق کیس کی سماعت  ہوئی،جسٹس اشتیاق ابراہیم اور جسٹس صاحبزادہ اسد اللہ نے درخواست کی سماعت کی، وکیل نے کہاکہ میرے موکل کے خلاف درج مقدمات کی تفصیلات فراہم کی جائیں۔آئی جی پولیس کی جانب سے رپورٹ عدالت میں پیش کردی گئی،ایڈیشنل ایڈووکیٹ جنرل نے کہاکہ ظاہر شاہ طورو کے خلاف کوئی پولیس کیس نہیں،درخواست گزار کے خلاف اینٹی کرپشن مردان میں ایک مقدمہ درج ہے،وکیل درخواست گزار نے کہاکہ میرے موکل کو نقص امن کے تحت گرفتار نہ کیا جائے،عدالت نے درخواست گزار کو تھری ایم پی او کے تحت گرفتار نہ کرنے کا حکم دیدیا۔