میرپورخاص: میرپورخاص ضلع میں بڑھتی ہوئی بد امنی لاقانونیت اور شہروں میں غلاظت کے ڈھیروں اور گندے پانی کے جوہڑ قائم ہونے اور انتظامیہ کی بے حسی کی ڈی جی جی گروپ نے شدید مذمت کرتے ہوئے مطالبہ کیا ہے کہ ضلع بھر کے عوام کو بنیادی حقوق فراہم کئے جائیں۔ فیئر اینڈ فری الیکشن نیٹ ورک کے تحت قائم ہونے والے ڈسٹرکٹ گورنرز گروپ کا ماہانہ اجلاس کنوینر مقصود احمد آرائیں کی صدارت میں ہوا جس میں انجم شہزادی ،تاج بلوچ ،امداد سراج اور دیگر ممبران نے شرکت کی ،اجلاس میں ضلع بھر میں بڑھتی ہوئی بد امنی لاقانونیت اور جرائم کی وارداتوں سمیت شہری علاقوں میں صفائی ستھرائی کے شدید فقدان کی شدید مذمت کرتے ہوئے کہا گیا کہ ضلع بھر میں امن و امان کی صورتحال خراب ہو چکی ہے ،لوٹ مار کرنے والوں کو پولیس گرفتار کرنے میں ناکام ہے ،جبکہ بلدیاتی ادارے شہریوں کو بنیادی سہولیات فراہم کرنے میں ناکام ہیں ،اس موقع پر امن و امان کی بحالی صفائی ستھرائی کا نظام بہتر کرنے اور دیگر مسائل کے حل کے لیے افسران سے ملاقات کے لیے کمیٹیاں تشکیل دی گئیں اور مطالبہ کیا گیا کہ عوام کو تحفظ کے ساتھ ساتھ صاف ستھرا ماحول فراہم کیا جائے اور بلدیاتی انتخابات جلد از جلد کرائے جائیں ۔

میرپورخاص: میرپورخاص کے رہائشی کی جانب سے محکمہ ریونینو کے افسران پر رشوت کے عوض غریب کسانوں کی 6 ایکڑ زرعی زمین کے کھاتے با اثر شخص کے نام منتقل کر نے دوبارہ کھاتے تبدیل کرنے پر 4 لاکھ روپے رشوت مانگنے کا الزام لگادیا۔ تفصیلات کے مطابق دیہہ 136 جھڑبی تعلقہ سندھڑ ی کے رہائشی مسمات رخسانہ ،مسمات جانزادی ،مسمات زبیدہ ،محمد عاشق ،محمد ہاشن ،مسمات باگ بھری نے میرپورخاص پریس کلب میں پریس کانفرنس کرتے ہوئے بتایا کہ دیہہ 136 جھڑبی میں ہماری 6 ایکڑ زرعی زمین ہے جو ہمارے آباﺅں اجداد سے چلی آرہی ہے ،لیکن اسسٹنٹ کمشنر تعلقہ سندھڑی حفیظ لغاری ،مختیار کار سندھڑی ،بابو چانگ اور تپیدار وریام نے جعل سازی کرتے ہوئے ہماری زمینوں کے کھاتے با اثر شخص نبی بخش کے نام پر منتقل کر دیئے جو کہ ہمارے ساتھ نا انصافی ہے ،اس حوالے سے ایڈیشنل ڈپٹی کمشنر میرپورخاص نے ہمارے حق میں فیصلہ کیا ہے اور اب مذکورہ افسران ہماری زمینوں کے کھاتے بنانے کے لیے ہم سے 4 لاکھ روپے رشوت کا مطالبہ کر رہے ہیں ،جس پر ہم نے رشوت دینے سے انکار کیا تو ہمیں خطرناک نتائج کی دھمکیاں دے رہے ہیں ،انھوں نے سپریم کورٹ کے چیف جسٹس ،صدر پاکستان ، وزیر اعظم ،گورنر سندھ ،وزیر اعلیٰ سندھ سے مطالبہ کیا ہے کہ اسسٹنٹ کمشنر سندھڑی ،مختیار کار اور تپیدار کو معطل کر کے کسی ایماندار افسر سے انکوائری کرا کے ہمارے ساتھ انصاف کیا جائے ۔

میرپورخاص: میرپارخاص میں مضر صحت لسی پینے سے 7 خواتین سمیت 10افراد کی حالت غیر ہو گئی ،متاثرہ افراد کو سول اسپتال میں داخل کر دیا گیا۔میرپورخاص کے قریب گوٹھ سہراب خان مری میں مضر صحت لسی پینے کی وجہ سے 17 سالہ عینی مری ،دلشاد احمد ،مسمات فاطمہ ،نازو ،آنی ،وسنتی ،سورزی ،شرفی سمیت 10 افراد کی حالت خراب ہو گئی ،جنھیں بے ہوشی کی حالت میں سول اسپتال میرپورخاص میں داخل کر دیا گیا ،اسپتال میں متاثرہ افراد کے ورثا محمد عثمان اور جمعہ مری نے بتایا کہ لسی ایک دن پرانی تھی اور گرمی کی شدت سے مضر صحت ہو چکی تھی ،جس کا علم ہمیں نہ ہو سکا اور پینے سے حالت غیر ہو گئی۔

حیدرآباد: زکوٰة کونسل سندھ کے چیرمین جسٹس ریٹائرزاہد قربان علوی نے گورنمنٹ بوائزہائی اسکول ہٹڑی کے 50 طالب علموں میں زکوٰة فنڈ سے مفت یونیفارم تقسیم کرنے کے موقع پر طالب علموں پر زور دیا کہ وہ اپنی تعلیم پر خصوصی توجہ دے کر نہ صرف اعلیٰ تعلیم حاصل کریں بلکہ خود میں قابلیت بھی پیدا کریں ۔انھوں نے ہٹڑی گورنمنٹ بوائز ہائی اسکول میں مفت یونیفارم تقسیم کرنے کی تقریب سے خطاب کرتے ہوئے کہا کہ زکوٰة فنڈ سے اہل طالب علموں کو میرٹ اور مورا اسکالر شپ کی مد میں امداد دی جارہی ہے جس کا مقصد سندھ کے ذہین اور مستحق طالب علموں کو مزید علم حاصل کرنے کا موقع فراہم کرنا ہے ۔ انھوں نے کہا کہ تعلیم یافتہ معاشرے سے ہی ترقی ممکن ہے انھوں نے اساتذہ پر زور دیا کہ وہ طالب علموں کی تربیت اپنی اولاد کی طرح کریں تاکہ طالب علم کسی منفی سرگرمیوں سے دور رہ کر صرف اپنی تعلیم پر توجہ دیں اور وہ معاشرے کے کارآمد اور باشعور فرد بن کر قوم اور ملک کی ترقی میں اپنا بھرپور کردار ادا کریں ۔ انھوں نے والدین کو اپیل کی کہ وہ اپنے بچوں پر نظر رکھیں کہ وہ کسی منفی سرگرمی میں مبتلا نہ ہوں اور اپنے والدین کی مثبت خواہشات کے مطابق تعلیم حاصل کریں ۔ اس موقع پر جسٹس ریٹائرڈ زاہد قربان علوی نے اسکول کو زکوٰة فنڈ سے تین واٹر کولر اور تین پنگھے بھی دیے ۔ تقریب سے ضلعی زکوٰة کمیٹی کے چیرمین شیر محمد پیر زادہ نے زکوٰة فنڈ میں سے ضلع کے مختلف ہسپتالوں میں مستحق مریضوں کے علاج اور بے سہارا اور مستحق خواتین کو ملنے والی زکوٰة کے حوالے سے تفصیلی عداد وشمار پیش کیے تقریب میں سیکریٹری لینڈ یوٹیلائیزیشن آفتاب میمن ، ڈی او سیکنڈری اسکول غلام فارق لغاری ، پی پی پی سندھ کے سینیر رہنما ملابخش مشوری کے علاوہ اسکول کے ہیڈ ماسٹر بھی موجود تھے ۔

حیدرآباد:  یورپی یونین کے وفد مشن لیڈر اقبال سبحان کی قیادت میں ڈپٹی کمشنر ٹنڈو محمد خان آصف میمن سے ان کے دفتر میں ملاقات کی ۔ اس موقع پر ضلع ٹنڈو محمد خان میں ترقیاتی منصوبوں کے جال بچھانے کے معاملات پر غور وخوص کیاگیا ۔ ڈی سی ٹنڈو محمد خان نے وفد کو ضلع میں جاری مختلف ترقیاتی اسکیموں کے حوالے سے تفصیلی آگاہی دی اور مختلف شعبوں میں یورپی یونین کے تعاون کے متعلق بتایا۔ اس موقع پر یورپی یونین کے مشن لیڈر اقبال سبحان نے ڈپٹی کمشنر کو یقین دہانی کرائی کہ یورپی یونین کی جانب سے صحت اور تعلیم کے شعبوں میں جاری اسکیموںکو مکمل کرنے میں بھرپور تعاون کیا جائے گا جب کہ مختلف شعبوں میں افرادی قوت میں اضافہ کرنے کے لیے ماہرانہ صلاحیتوں کو اجاگر کرنے میں یورپی یونین کی جانب سے مختلف کورسز کرانے کا بندوبست بھی کیا جائے گا تاکہ نجی شعبوں میں ملازمتوں کے نئے مواقع پیدا کیے جاسکےں۔ یورپی یونین کے وفد نے ڈی سی کو یقین دہانی کرائی کہ ملک میں توانائی کے بحران کے خاتمے سمیت دیگر شعبوں میں سرمایہ کاری کے لیے ماحول کو ساز گار بنانے اور سرمایہ کاری کو فروغ دینے کے لیے موثر اقدامات کیے جائیں گے کیوں کہ یورپی یونین کا مقصد غریب ممالک کی ہر لحاظ سے مدد کرنا ہے ڈی سی اس موقع پر وفد کا شکریہ ادا کرتے ہوئے امید ظاہر کی کہ یورپی یونین کے تعاون سے ضلع میں جاری ترقیاتی منصوبوں کو جلد مکمل کرنے میں مدد ملے گی ۔ جس سے ضلع کے عوام کی معیار زندگی بہتر ہو گی ۔ اس موقع پر مختلف محکموں کے افسران نے اپنے محکموں کے حوالے سے وفد کو تفصیلی بریفنگ بھی دی ۔